ზუგდიდის პირველი საჯარო სკოლის დაარსების 150 წლის იუბილე საზეიმოდ აღნიშნეს. ღონისძიებაზე სკოლის ყოფილი დირექტორები, მასწავლებლები და წარმატებული კურსდამთავრებულები გაიხსენეს და მათ მიღწევებზე ისაუბრეს. ღონისძიება რუსეთის ფედერაციაში მოღვაწე ბიზნესმენმა მიხეილ ხუბიტიამ დააფინანსა. მან რამდენიმე პედაგოგს, მათ შორის, მოქმედ დირექტორს ლეპტოპები გადასცა და სკოლის წარმატებაში შეტანილი წვლილისთვის მადლობა გადაუხადა. წლევანდელ კურსდამთავრებულ მედალოსნებს კი აიფონები აჩუქა. მანამდე, განათლების სამინისტროს მიერ 8 კურსდამთავრებული ოქროს, ხოლო ერთი ვერცხლის მედლით დაჯილდოვდა.



ბიზნესმენმა მიხეილ ხუბუტიამ სიტყვით გამოსვლისას თქვა, რომ ზუგდიდელ ახალგაზრდებს ხუბულავას ქუჩაზე ოლიმპიური სტანდარტების შესაბამის საცურაო აუზს აუშენებს. მან ჟურნალისტებთან კომენტარის გაკეთება არ ისურვა.

სკოლის იუბილე მასწავლებლებს და მოსწავლეებს ზუგდიდის რესურსცენტრის ხელმძღვანელმა კახაბერ ფარცვანიამ მიულოცა.

"ეს სკოლა 150 წლის წინ მაშინდელ ზუგდიდის მაზრაში შეიქმნა. მაშინ ეს იყო ვაჟთა სკოლა. მოგვიანებით კი გახდა ქალთა და ვაჟთა ინტეგრირებული სკოლა. ეს არ არის ცოტა დრო... ამ სკოლამ გამოიარა ბევრი სირთულე, მეორე მსოფლიო ომი და გაჭირვების ჟამი, მაგრამ ეს სკოლა ყოველთვის ამაყად იდგა ფეხზე“, - აღნიშნა ფარცვანიამ.

ჟურნალისტების კითხვაზე, თუ რას ფიქრობს ის მიხეილ ხუბუტიას მიერ სკოლის ღონისძიების დაფინანსებაზე, ფარცვანიამ გვიპასუხა, რომ ამაში ცუდს ვერაფერს ხედავს.

"რა შეფასებასაც ადამინები აკეთებენ ხუბუტიას მიმართ ეს უკვე მათი პირადი და ინდივიდუალური მოსაზრებაა. ნეტავ, მომცეს იმის საშუალება, რომ ჩემს სკოლას დავეხმარო. მე ამაში ცუდს ვერაფერს ვერ ვხედავ", - თქვა ფარცვანიამ.


დღეს უსაჩუქროდ არც მიხეილ ხუბუტია დარჩენილა. მას მოსწავლეებმა ოჯახის მფარველი ხატი გადასცეს. აღსანიშნავია, რომ დღეს ხუბუტიას დაბდების დღე აქვს. მას იუბილე ყოფილმა პედაგოგმა მიულოცა.

საღამო კონცერტით დასრულდა, რომელშიც მონაწილეობდნენ: ბესიკ კალანდაძე, მანანა თოდაძე, დავით ძიძიგური, ელენე კალანდაძე, ანსამბლი "მეტეხი" და „ქუჩის ბიჭები“.

"დღეს ჩვენს სკოლას 150 წლის იუბილე აქვს. ძლიან ბედნიერი ვარ, რომ ამ სკოლის კურსდამთავრებული ვარ. სკოლა ოქროს მედალზე დავამთავრე და ბატონმა მიშამ სიმბოლურად ეს დღე გაგვილამაზა. მოგვიწყო კონცერტი და მედალოსნებს საჩუქარი გადმოგვცა", - თქვა წლევანდელმა კურსდამთავრებულმა  მარიამ გიგანმა.


ღონისძიებას არ ესწრებოდნენ ადგილობრივი ხელისუფლების წარმოამდგენლები. იუბილეზე მხოლოდ, ვიცე-მერი გია გულორდავა იმყოფებოდა, რომელიც ამავე სკოლის კურსდამთავრებულია. მას, როგორც წარმატებულ კურსდამთავრებულს სიმბოლური სიგელი გადაეცა.

ამავე თემაზე:

ხუბუტიამ პირველი სკოლის პედაგოგებსა და მოსწავლეებს აიფონები და ლეპტოპები აჩუქა