ზუგდიდში, ბარამიას ქუჩაზე კორპუსების სამშენებლო სამუშაოებს  შპს „რუმსი“ ახორციელებს. სწორედ აქ დასაქმებული მუშების ნაწილი ითხოვს ხელფასების დროულად დარიცხვას. რადიო „ათინათს“ შპს-ში უთხრეს, რომ მუშები, რომლებსაც ხელფასებთან დაკავშირებით პრეტენზიები აქვთ, მათ არ დაუქირავებიათ. „რუმსის“ დირექტორის ნიკოლოზ პაპიძის განმარტებით, მათ ჰყავთ თავიანთი ქვეკონტრაქტორები და სწორედ მათი კომპეტენციაა ობიექტზე დასაქმებული ადამიანებისთვის ხელფასების გადახდა. პაპიძის ცნობით, ის მუშები, რომლებიც   ხელფასებს ითხოვენ, ფიზიკური პირის ფარიზ ვალიევის მიერ არიან დაქირავებულები, ხოლო კომპანიას ვალიევთან ფინანსური დავალიანება არ აქვს.

„ისევე, როგორც კომპანია „დაგმა“ დაიქირავა ქვეკონტრაქტორი კომპანია, „რუმსი“ და ასრულებინებს ამ მასშტაბურ პროექტს, ასევე კომპანია „რუმსმა“ სეგმენტებად დაყო შესასრულებელი სამუშაოები და ყავს თავის პატარა ქვეკონტრაქტორები. უმრავლეს შემთხვევაში ესენი არიან ორგანიზაციები, შპს-ები და ფიზიკური პირები, რომლებთანაც ჩვენ გვაქვს სამართლებრივი ურთიერთობა, ხოლო ვის ქირაობენ ისინი - ჩვენ საქმის კურსში არ ვართ. არანაირი ხელფასი ჩვენგან მათ არ ეკუთვნით, იმ მარტივი მიზეზების გამო, რომ ჩვენ შორის არ არსებობს არანაირი სამართლებრივი და ფინანსური ურთიერთობა. მე ეს ადამიანები არ დამიქირავებია, ისევე როგორც არ დამიქირავებია იმ ობიექტზე მომუშავე არცერთი მუშა. რაც შეეხება ამ პიროვნებებს, ესენი დაქირავებული ჰყავს ჩვენს ე.წ ქვეკონტრაქტორს - ეს არის ეროვნებით აზერბაიჯანელი პიროვნება, ფარიზ ვალიევი. მას გარკვეული სამუშაოები ჩავაბარეთ და ამ სამუშაოების 90% თანხების მას უკვე მიღებული აქვს, ხოლო მის მიერ დაქირავებულ მუშებს ხელზე აძლევდა თანხას თუ ურიცხავდა ჩვენ ინფორმაცია არ გვაქვს. ამ მუშებზე კომპანიას არანაირი ვალდებულება არ ჰქონდა - ფარიზ ვალიევმა, თუ მათ კუთვნილი ხელფასები არ დაურიცხა, მუშებმა სწორედ მასთან უნდა იდავონ სამართლებრივად. ვალიევი საქართველოში არ იმყოფება, თუმცა ის რამდენიმე დღეში ჩამოვა, რადგან მას გარკვეული სამუშაოები დარჩა შესასრულებელი  და ის აუცილებლად შეხვდება მუშებს“, - აცხადებს პაპიძე.

ზუგდიდში, ბარამიას ქუჩაზე დევნილთა საცხოვრებელი კორპუსების მშენებლობაზე დასაქმებული მუშების ნაწილი აცხადებს, რომ მათ 2 თვის ხელფასი არ მიუღიათ. ისინი თანხების დროულად დარიცხვას ითხოვენ.


ამავე თემაზე:

ზუგდიდში დევნილთა კორპუსების მშენებლობაზე დასაქმებული მუშები ხელფასის ჩარიცხვას ითხოვენ (ვიდეო)