ზუგდიდში, კულტურის სახლის მიმდებარედ ე.წ. "კოკა-კოლის" ყოფილი შენობის ტერიტორიაზე საინვესტიციო ჯგუფს მრავალბინიანი კორპუსის აშენება სურს, რომლის პირველ სართულზე სავაჭრო ცენტრი იქნება განთავსებული. შესაბამისი პროექტი არქიტექტორმა ლევან სოლოღაშვილმა დემოკრატიული ჩართულობის ცენტრში დღეს წარადგინა. მისი თქმით, აღნიშნული შენობა ქალაქს დისკომფორტს არ შეუქმნის.  

„პირველ სართულზე იქნება მოლი. შენობა აშენდება სიღრმეში ისე, რომ სივრცულ არეალს არ შევეხოთ ზედმეტად. მესმის, რომ ეს თემა სენსიტიურია ნებისმიერი დაბალი განაშენიანების ქალაქისთვის, თუმცა, არც ისე მაღალი კორპუსი არ არის, რომ ამაზე ვიკამათოთ. რა თქმა უნდა, შევეცდებით გავითვალისწინოთ ის შენიშვნები, რაც აქ ითქვა, ისე რომ, პროექტიც განხორციელდეს. პროექტში გათვალისწინებულია საპარკინგე ტერიტორია, რომელიც შენობას აკმაყოფილებს, ასევე გვაქვს დამატების პერსპექტივაც. ეს შეხვედრა მოვაწყეთ იმიტომ, რომ ამ ქალაქის წინაშე ვგრძნობ გარკვეულ პასუხისმგებლობას. 10 წელია აქ ვცხოვრობ და ვიცი, რომ მსგავსი პროექტები სენსიტიურია. არ მინდა, რომ ამ პროექტის შესახებ მთავრობის ბეჭედდარტყმული დოკუმენტიდან გაიგონ“, - თქვა სოლოღაშვილმა.

შეხვედრის მონაწილეთა ნაწილმა პროექტი მოიწონა, თუმცა აღნიშნეს, რომ 15 სართულიანი კორპუსის სიმაღლე ქალაქის იერსახეს არ შეესაბამება. პროექტ ZRDA -ს სამეგრელო-ზემო სვანეთის კოორდინატორის ია ესებუას თქმით, ზუგდიდი არის პატარა ქალაქი და თავისი ავთენტურობა არ უნდა დაკარგოს.

„ჩემი აზრით, 15 სართულიანი მაღალია იმ სივრცისთვის, სადაც ეს პროექტი უნდა განხორციელდეს. ეს ადგილი ქალაქის ცენტრად ითვლება და იქ ამხელა შენობის აშენება კონტექსტიდან ამოვარდნილი იქნება, რადგან იქ არ არის მაღალსართულიანი შენობები“, - აღნიშნა მან.

შეხვედრას ზუგდიდის მერიის არქიტექტურის სამსახურის უფროსი სპეციალისტი ბაკა თოდუა ესწრებოდა. ის ვარაუდობს, რომ კოსტავას და რუსთაველის ქუჩის კვეთაზე არის მაღალი ინტენსივობის მოძრაობა და აღნიშნული კორპუსის აშენება, მანამ, სანამ იქ შესაბამისი საგზაო ინფრასტრუქტურა არ მოეწყობა, კიდევ უფრო დაიტვირთება.

„წინასწარ იმის თქმა, რამდენად იქნება მოსახერხებელი იქ მცხოვრებლებისთვის, რთულია, მანამ, სანამ არ დაიდება შესაბამისი დასკვნა. რაც შეეხება სიმაღლეს, იმაზე მეტია მოთხოვნილი, რაც დაშვებულია, თუმცა ეს არის მეორეხარისხოვანი, ვიდრე თავად კომუნიკაციური პრობლემა. დადვანის ქუჩის ჩასასვლელში არის ხიდი გათვალისწინებული, რომელიც ჯერ არ არის განხორციელებული, ამდენად, წვდომა მეორე ნაპირთან რთულია“, - თქვა თოდუამ.

ამ მოსაზრებას არქიტექტორი არ დაეთანხმა. სოლოღაშვილის განმარტებით, აღნიშნული პრობლემა ამ პროექტის განხორციელებით არ იქმნება - ის უკვე არსებობს. მისი თქმით, დადვანის ქუჩაზე ხიდის აგების შედეგად, მოძრაობა განიტვირთება.

ლევან სოლოღაშვილმა აღნიშნა, რომ პროექტს, მშენებლობის ნებართვის მისაღებად, ზუგდიდის მერიასაც წარუდგენს.