ოკუპირებულ აფხაზეთში მცხოვრებლებს გალის რაიონის მიმართულებით ენგურის ხიდის გადაკვეთა განსაკუთრებული შეზღუდვების გარეშე შეუძლიათ. გალელები ამბობენ, რომ ისინი გადასვლას მხოლოდ ცალმხრივად ახერხებენ.

„შვილები აფხაზეთში არიან. გადმოსვლა უნდათ, მაგრამ ვერ ახერხებენ, ახლა მე წავიდე იქით, არ ვიცი რა დრომდე გასტანს ეს შეზღუდვები“, - ამბობს ჭუბურხინჯი მკვიდრი.

რადიო „ათინათის“ ინფორმაციით, ხიდზე ორმხრივი მიმოსვლა მხოლოდ ენგურჰესზე დასაქმებულებს და ექიმის ცნობის მქონე პაციენტებს შეუძლიათ.

ენგურის ხიდზე მიმოსვლა გუშინ საღამოს შეიზღუდა. აფხაზეთის დე ფაქტო რესპუბლიკის სახელმწიფო უსაფრთხოების სამსახურში ამბობენ, რომ ეს ზომები საქართველოში, მათ შორის, ზუგდიდში მიმდინარე საპროტესტო აქციების გამო მიიღეს.