მესტიის მუნიციპალიტეტის სივრცითი მოწყობის დოკუმენტის საჯარო განხილვა დაიწყო. განვითარების გენერალურ გეგმაზე, საკონსულტაციო ცენტრმა ,,გეოგრაფიკმა” ქართველ და უცხოელ ექსპერტებთან ერთად იმუშავა. სამხარეო ადმინისტრაციის პრესსამსახურის ინფორმაციით, შემუშავებისა და განხილვის პროცესში ადგილობრივი მოსახლეობაა ჩართული.

პროექტში გათვალისწინებულია კულტურული მემკვიდრეობის, სამთო ინდუსტრიის, ტურიზმის, სოფლის მეურნეობის, ენერგეტიკის, გარემოს დაცვის, ტრანსპორტის და კომუნიკაციების საკითხები. გენერალურ გეგმაში გათვალისწინებულია მოქმედი და ახალი სამთო სათხილამურო კურორტების მაქსიმალურად გამოყენება. ასევე მომზადდა დეტალური ზონირებული რუკები.

საჯარო განხილვაში, ადგილობრივ მოსახლეობასთან ერთად მონაწილეობა პრემიერ-მინისტრის მრჩეველმა რეგიონულ საკითხებში სოზარ სუბარმა, სამეგრელო-ზემო სვანეთის სახელმწიფო რწმუნებულმა ალექსანდრე მოწერელიამ, რეგიონული განვითარებისა და ინფრასტრუქტურის მინისტრის მოადგილემ მზია გიორგობიანმა და ადგილობრივი ხელისუფლების წარმომადგენლებმა მიიღეს.

,,გენერალური განვითარების გეგმის მიზანია, შევინარჩუნოთ სვანეთი, როგორც კულტურული, ისტორიული, ბუნებრივი ლანდშაფტი, ამავდროულად იყოს შესაძლებლობა, მეტი განვითარების, მეტი ტურისტის მიღების, მეტი დასაქმების, და შემოსავლის შექმნის. მნიშვნელოვანია, რომ ამ პროცესში მოსახლეობა არის ძალიან აქტიურად ჩართული და მათთან შეთანხმების გარეშე არ მიღება არცერთი გადაწყვეტილება, ეს არის სწორედ ,,ქართული ოცნების“ მთავარი ხელწერა, მთავარი ნიშანი და სწორედ ასე ვაპირებთ გავაგრძელოთ მთელი საქართველოს მასშტაბით“ - განაცხადა სუბარმა.

ალექსანდრე მოწერელიას განმარტებით, ყველა მნიშვნელოვანი პროექტის განხილვა საჯაროდ და მოსახლეობასთან გამართული კონსულტაციებით ხდება:

,,გენერალური განვითარების გეგმა ნამდვილად მნიშვნელოვანია ჩვენი რეგიონის მდგრადი განვითარებისათვის, ამავე დროს ქაოტური მშენებლობების მოწესრიგებისათვის და გრძელვადიანი ხედვისთვის, რომელიც ხელს შეუწყობს ჩვენი რეგიონის განვითარებას. მოსახლეობასთან ერთად პირველი ეტაპის განხილვა დღეს დაიწყო, რომელიც გაგრძელდება და ჩვენ მივიღებთ საბოლოო ჯამში იმ დოკუმენტს, კონცეფციას რაც მოგვცემს საშუალებას რომ სწორად განვავითაროთ და მაქსიმალურად გამოვიყენოთ ის შესაძლებლობები რაც გაგვაჩნია რეგიონში” - განაცხადა ალექსანდრე მოწერელიამ.

მესტიის მუნიციპალიტეტის სივრცით-ტერიტორიული დაგეგმვის დოკუმენტი რეგიონული განვითარებისა და ინფრასტრუქტურის სამინისტროს სივრცითი დაგეგმარების დეპარტამენტის დაკვეთით მომზადდა. პროცესში ჩართული იყო მინისტრის მოადგილე მზია გიორგობიანი, რომელმაც ხაზი გაუსვა გეგმის მნიშვნელობას და ყურადღება გაამახვილა ტურიზმის სექტორის განვითარებაზე.

საჯარო განხილვა მესტიის შემდეგ მულახისა და ჭოლაშის ადმინისტრაციულ ერთეულებში გაიმართება. საბოლოოდ კი დოკუმენტი მოსახლეობასთან ფართო კონსულტაციებისა და განხილვების შემდეგ უნდა მიიღონ.