თემირლან მაჩალიკაშვილის მშობლები მალხაზ მაჩალიკაშვილი და მედეა მარგოშვილი შვილის საქმეზე საპარლამენტო საგამოძიებო კომისიის შექმნის მოთხოვნით ხელმოწერებს ზუგდიდში აგროვებენ. მათ ზუგდიდელების ხელმოწერების შეგროვება იუსტიციის სახლის მიმდებარედ დილას დაიწყეს, მოგვიანებით კი ცენტრალურ ბულვარში გადაინაცვლეს. ზუგდიდი ბათუმის შემდეგ მეორე ქალაქია, სადაც ისინი ჩავიდნენ, აქედან კი ქუთაისში გეგმავენ წასვლას. მალხაზ მაჩალიკაშვილი ამბობს, რომ ხელმოწერების შესაგროვებლად საქართველოს ყველა რეგიონს მოივლის.

„150 დეპუტატის სახელზე შევიტანე წერილი, ამის შემდეგ პეტიცია შევიტანეთ, რომ პარლამენტში დროებითი საგამოძიებო კომისია შექმნილიყო, მაგრამ პარლამენტმა და მთელმა სახელმწიფომ მითხრა უარი. მე ზუსტად ვიცი, რატომაც აკეთებენ ამას. ეს იმიტომ ხდება, რომ სიმართლე თემირლანის მკვლელობისა და სხვა დანარჩენი საქმეების შესახებ, რაც კბილებით უჭირავთ, არ მივიდეს საზოგადოებამდე და ჩქმალავენ ამ ამბებს, რათა თავზე არ დაემხოთ ხელისუფლება. იძულებული გავხდი, რომ გამოვსულიყავი ქუჩაში, რომ შემეგროვებინა 100 ათასამდე ხელმოწერა“, - უთხრა ჟურნალისტებს მაჩალიკაშვილმა.

მის მოთხოვნას დილიდან შეუერთდნენ ზუგდიდელები. ისინი მიიჩნევენ, რომ თემირლან მაჩალიკაშვილის საქმეზე გამოძიება არასწორი მიმართულებით შეგნებულად მიდის და მაჩალიკაშვილებს საქმის გამოძიების მოთხოვნაში მხარს უჭერენ.  ხელმოწერების შეგროვება ზუგდიდში საღამოს 8 საათამდე გაგრძელდება.

2017 წლის დეკემბერში სუს-ის მიერ პანკისში ჩატარებული სპეცოპერაციისას თავის არეში სასიკვდილოდ დაჭრილი 19 წლის თემირლან მაჩალიკაშვილი 2018 წლის 10 იანვარს თბილისში, საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, პანკისში ჩატარებული სპეცოპერაციისას ახმედ ჩატაევთან კავშირის ბრალდებით ხუთი პირი დააკავეს, რაც შეეხება თემირლან მაჩალიკაშვილს, უწყებაში ამტკიცებენ, რომ მან დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. ოჯახი ამ ვერსიას კატეგორიულად უარჰყოფს და ამტკიცებს, რომ გასროლის მომენტში თემირლანს ეძინა.

ობიექტური გამოძიებისა და საქმეში დამნაშავეების დასჯის მოთხოვნით, მალხაზ მაჩალიკაშვილმა აქციები თბილისში, რუსთაველის გამზირზე გასულ, 2018 წელს დაიწყო. რამდენიმე თვის წინ კი პარლამენტმა მისი შვილის საქმეზე საგამოძიებო კომისიის შექმნის მოთხოვნას მხარი არ დაუჭირა.