ზუგდიდის საკრებულოს სხდომაზე ერთ-ერთ საკითხს, რომელიც ქალაქის ტერიტორიაზე არსებული მიწის ნაკვეთის განაშენიანების რეგულირების გეგმის დამტკიცებას ეხებოდა, ხმაური და დაპირისპირება მოჰყვა. სხდომაზე მყოფმა ბიზნესმენმა მანანა მიქავამ საკითხის განსახილველად გატანა გააპროტესტა და თქვა, რომ აღნიშნული უძრავი ქონება მას ეკუთვნის. საკრებულოზე მას განუმარტეს, რომ ნაკვეთი ზუგდიდის მერიის ბალანსზეა და მასზე უფლებები არ გააჩნია.



მიქავა სხდომაზე თავის იურისტთან ნანა ფირცხელავასთან ერთად იყო მისული. ისინი ცდილობდნენ დეპუტატებისთვის დაემტკიცებინათ, რომ ქონება ბიზნესმენს ეკუთვნის და მერიამ ის უსამართლოდ დაიკანონა. მიქავას თქმით, მან მიწის ნაკვეთის ნაწილი მერიას გარიგების საფუძველზე დაუთმო.

„ვფლობდი 9 ათას კვადრატულ მეტრამდე ნაკვეთს. გეგა შენგელიასთან მქონდა მოლაპარაკება და დავთმე გარკვეული ნაწილი. ინვესტორებიც მყავდა მოყვანილი და მერიაში შეხვედრაც გვქონდა. ახლა ამის გასხვისება უნდათ და ეჭვი მაქვს, რომ დანარჩენსაც წამართმევენ. უსამართლოდ წამართვეს ქონება და ახლა ეს საქმე ისევ სასამართლოშია. ამის ფონზე საკრებულო და მერია სადაო მიწაზე მშენებლობას გეგმავს, რაც უკანონოა“, - ამბობს მიქავა.

საკრებულოს თავმჯდომარესა და მანანა მიქავას შორის დაწყებული კამათი სიტყვიერ დაპირისპირებაში გადაიზარდა. ბიზნესმენმა მამუკა წოწერიას "ნაგავი" უწოდა და წყალი შეასხა. ინციდენტის შემდეგ დაცვის პოლიციამ მანანა მიქავას და მისი იურისტის დარბაზიდან გაყვანა სცადა, თუმცა უშედეგოდ.

მიქავამ პოლიციაც გამოიძახა და სამართალდამცავებისთვის ცდილობდა მიეწოდებინა ის ინფორმაცია და დოკუმენტები, რომელიც მისი მტკიცებით, სადაო მიწაზე მის უფლებებს ადასტურებს.

საკრებულოზე მომხდარი ინცინდენტის გამო ტექნიკური შესვენება გამოცხადდა. ამის შემდეგ მიქავას და მის იურისტს დარბაზი დაატოვებინეს.

საბოოლოდ, საკრებულომ მიწის საკითხი განსახილველად გაიტანა და მას მხარი ერთხმად დაუჭირა. მიწის ამ ნაკვეთზე უახლოეს მომავალში საბავშვო ბაღის აშენება იგეგმება.

აღნიშნული ფაქტის გამო მანანა მიქავა შეუძლოდ გახდა. მას სასწრაფო დახმარების ექიმებმა პირველადი სამედიცინო დახმარება ადგილზე აღმოუჩინეს.

მერიაში ამბობენ, რომ მიწის ნაკვეთი არის მუნიციპალიტეტის საკუთრება და შესაბამისად, არანაირი გარიგება არ შემდგარა და ვერც შედგებოდა.

ინფორმაციისთვის, საუბარია ზუგდიდის ცენტრში, მდინარე ჩხოუშის ნაპირთან მდებარე 9 ათას კვადრატულ მეტრამდე ფართობზე, რომელიც მანანა მიქავას წინა ხელისუფლების დროს იჯარით 150 000 დოლარად გადაეცა. მას 4 მილიონიანი ინვესტიცია უნდა შგანეხორციელებინა და აკვაპარკი უნდა აეშენებინა, თუმცა ვალდებულებები გარკვეული მიზეზების გამო, ვერ შეასრულა და ხელშეკრულება გაუუქმეს.

აღნიშნული გადაწყვეტილება მიქავამ გაასაჩივრა, რის შემდეგაც ორივე ინსტანციის სასამართლომ, ბიზნესმენის საჩივარი ნაწილობრივ დააკმაყოფილა და საკრებულოს დაავალა ახალი ინდივიდუალური ადმინისტრაციული სამართლებრივი აქტის გამოცემა. მოგვიანებით, მერიამ მას ორთვიანი ვადა მისცა, თუმცა ბიზნესმენმა ვალდებულებები ისევ ვერ შეასრულა. საბოლოოდ, აღნიშნული ტერიტორია ზუგდიდის მერიის ბალანსზე რჩება.

სწორედ აღნიშნულ ტერიტორიასთან დაკავშირებით ედავება გამოძიება ქრთამის აღებას ზუგდიდის ყოფილ მერსა და მის მოადგილეს.