საერთაშორისო გამჭვირვალობა-საქართველოს ინფორმაციით, ჩხოროწყუს მუნიციპალიტეტის მერიამ 2022 წლის იანვარში ჩხოროწყუს საჯარო სკოლების მოსწავლეთა სატრანსპორტო მომსახურება შეისყიდა შპს “სალომე 92”-სგან, რომელიც შესყიდვამდე ორი თვით ადრე შეიქმნა. მათივე განმარტებით, კომპანიასთან გაფორმებული ხელშეკრულების ღირებულება 207,197 ლარია.

შპს “სალომე 92”-ს თანაბარი 50-50% წილის მფლობელები არიან მმართველ პარტიასთან დაკავშირებული სალომე და ჯამბულ პაპავები. ჯამბულ პაპავა პარტია „ქართული ოცნების“ კოორდინატორია. სალომე პაპავა, რომელიც 2022 წლის იანვრიდან ხელშეკრულებით ჩხოროწყუს მერიაში მუშაობს, მანამდე “ქართული ოცნებიდან” საქართველოს პარლამენტის მაჟორიტარი დეპუტატების გოგა გულორდავას, შემდეგ კი ალექსანდრე მოწერელიას ბიუროში მუშაობდა. სალომე პაპავამ მაჟორიტარის ბიურო 2021 წლის აგვისტოში დატოვა, როცა ალექსანდრე მოწერელია პარტია “საქართველოსთვის” წევრი გახდა.

ჯამბულ პაპავა ჩხოროწყუს მერთან დათო გოგუასთან დაახლოებული პირია. დათო გოგუა ჩხოროწყუს მერია 2012 წლის დეკემბრიდან დღემდე (2017 წლამდე - გამგებელი).

ჯამბულ პაპავა 2012-2021 წლებშიც მონაწილეობდა ჩხოროწყუს მუნიციპალიტეტის შესყიდვებში, ოღონდ სხვა კომპანიის - სოლიდარული პასუხისმგებლობის საზოგადოება “ჯამბულ პაპავას” სახელით და საავტომობილო ტრანსპორტის მომსახურების ტენდერებითა და გამარტივებული შესყიდვებით სულ 873,645 ლარის ღირებულების კონტრაქტები აქვს მიღებული. 2022 წლის იანვარში ჯამბულ პაპავამ დაიწყო ამ საზოგადოების ლიკვიდაცია, პარალელურად კი თავის შვილთან ერთად დააფუძნა ახალი კომპანია “სალომე 92”.

ჩხოროწყუს მერიის თანამშრომლის, სალომე პაპავასა და მისი მამის ჯამბულ პაპავას კუთვნილმა კომპანიებმა 2012 წლის შემდეგ ჩხოროწყუს მუნიციპალიტეტისგან 1,080,842 ლარის ღირებულების სახელმწიფო შესყიდვები მიიღეს'', - - აღნიშნულია TI-ს მიერ გავრცელებულ განცხადებაში.

“საერთაშორისო გამჭვირვალობა - საქართველოს” შეფასებით, შპს “სალომე 92”-ისა და სპს “ჯამბულ პაპავას” ჩართულობა ჩხოროწყუს მუნიციპალიტეტის სახელმწიფო შესყიდვებში აჩენს ეჭვებს პროცესის კანონიერებასთან დაკავშირებით.

კვლევის ავტორები მიმართავენ  სახელმწიფო უსაფრთხოების სამსახურის ანტიკორუფციულ სააგენტოს, რომ შეისწავლოს თითოეული შესყიდვა და დაადგინო, შეიცავს თუ არა ისინი კორუფციის შესაძლო ნიშნებს.