აფხაზეთის დე ფაქტო რესპუბლიკაში მოქმედმა "რუს თანამემამულეთა ორგანიზაციების საკოორდინაციო კავშირმა" გააკრიტიკა აფხაზი აქტივისტების და ჟურნალისტების ნაწილის მიმართვა, რომელშიც ისინი უკრაინაში სისხლისღვრის შეჩერებისკენ მოუწოდებენ.

"ჩვენ მშვიდობისა და სისხლისღვრის წინააღმდეგი ვართ, მაგრამ მხარს ვუჭერთ რუსეთის არმიის ქმედებებს დენაციფიკაციისა და დემილიტარიზაციისთვის, რადგან გვესმის, რომ კაცობრიობის წინააღმდეგ ჩადენილი დანაშაულისთვის ანგარიშსწორება გარდაუვალია თავისი ბუნებით", - ნათქვამია  კავშირის განცხადებაში.

სისხლისღვრის შეჩერების მოწოდებაზე ნეგატიურ რეაქციას გუშინდელი ანტისაომარი მიმართვის ავტორი, ჟურნალისტი და მწერალი ნადეჟდა ვენედიქტოვა გამოეხმაურა. მისი თქმით, მათი შეშფოთება დაკავშირებულია ბირთვული ომის შესაძლო დაწყებასთან, რომელიც პლანეტას რადიოაქტიურ ჯოჯოხეთად გადააქცევს.

"1986 წელს, როდესაც ქარმა ჩერნობილის სტიქიის რადიოაქტიური მტვერი გადაიტანა, სოხუმის ქუჩებში დავსეირნობდი გაზაფხულის წვიმის ქვეშ და მცირე დოზა მივიღე. ორი წლის განმავლობაში მქონდა საშინელი სისუსტე და თავბრუსხვევა, თუმცა შემთხვევის ადგილიდან ათასობით კილომეტრი მაშორებდა! გლობალურმა დაპირისპირებამ, რომელიც თითქმის ყოველდღე იზრდება, შეიძლება გამოიწვიოს დაძაბულობის ისეთი ტემპერატურა, რომ ბირთვული ღილაკის დაჭერა თითქმის გარდაუვალი გახდეს, "- წერს იგი.

აფხაზი სამოქალაქო აქტივისტების ნაწილმა მიმართვა გაავრცელა, რომელსაც 20 - ზე მეტი ადამიანი აწერს ხელს. ისინი მხარეებს უკრაინაში სისხლისღვრის შეწყვეტისკენ მოუწოდებენ. მიმართვის ტექსტი მწერალმა და ჟურნალისტმა ნადეჟდა ვენედიქტოვამ გამოაქვეყნა.

პუბლიკაციას სოციალურ ქსელში დიდი გამოხმაურება მოჰყვა, ფეისბუკის მომხმარებელთა აფხაზური სეგმენტის ნაწილი კომენტარებში მხარს უჭერს მას, ზოგი კი მიუღებლად მიიჩნევს და პროვოკაციად აფასებს.

11 მარტს, სოხუმში, "დინამოს" სტადიონზე გაიმართა აქცია, რომლის მონაწილეებმა მხარი დაუჭირეს "რუსეთის ფედერაციის ქმედებებს დონბასის სეპარატისტული რესპუბლიკების ტერიტორიაზე მშვიდობისა და წესრიგის უზრუნველსაყოფად, ასევე უკრაინაში "დემილიტარიზაციის და დენაციფიკაციის პროცესს".

ე.წ. ლუგანსკის სახალხო რესპუბლიკის ხელმძღვანელმა ლეონიდ პასეჩნიკმა 10 მარტს ხელის მოაწერა ბრძანებას " აფხაზეთის დამოუკიდებლობის აღიარების შესახებ".

უფრო ადრე, აფხაზეთის დე ფაქტო რესპუბლიკის საგარეო საქმეთა სამინისტრომ გაავრცელა პრესრელიზი, რომელშიც ნათქვამია, რომ სოხუმმა და ე.წ დონეცკის სახალხო რესპუბლიკამ "დიპლომატიური ურთიერთობები დაამყარეს და ნოტები გაცვალეს".

26 თებერვალს, აფხაზმა ლიდერმა ასლან ბჟანიამ ხელი მოაწერა ბრძანებას დონბასის სეპარატისტული ე.წ.დონეცკისა და ლუგანსკის რესპუბლიკების აღიარების შესახებ.

რუსეთი უკრაინის წინააღმდეგ ომს 24 თებერვლიდან აწარმოებს. 21 თებერვალს, რუსეთის პრეზიდენტმა ვლადიმირ პუტინმა ცნო ე. წ. დონეცკისა და ლუგანსკის სახალხო რესპუბლიკების "დამოუკიდებლობა და სუვერენიტეტი". მანამდე რუსეთმა მოითხოვა, რომ უკრაინა არ გახდეს ნატოს წევრი. პუტინს უკრაინაში "სპეციალური სამხედრო ოპერაციის" მიზნად გამოცხადებული აქვს უკრაინის "დემილიტარიზაცია და დენაციფიკაცია".