აფხაზეთის დე ფაქტო რესპუბლიკის საგარეო საქმეთა სამინისტრომ საფრანგეთის მოქალაქე ტიფენ ლუკასი პერსონა ნონ გრატად გამოაცხადა "სადაზვერვო ინფორმაციის შეგროვების" გამო. ამის შესახებ ე.წ საგარეო საქმეთა მინისტრმა ინალ არძინბამ განაცხადა.

მისი თქმით, ლუკასი გაეროს სურსათისა და სოფლის მეურნეობის ორგანიზაციის (FAO) ერთ-ერთ პროგრამას ხელმძღვანელობდა, რომელიც გუდაუთის რაიონის სოფელ პრიმორსკოეში, რუსეთის სამხედრო ბაზის სიახლოვეს ხორციელდებოდა.

აფხაზეთში FAO - ს ( გაეროს სპეციალიზებული სააგენტოა, რომელიც შიმშილის წინააღმდეგ საბრძოლველად საერთაშორისო ძალისხმევას უდგას სათავეში) მიზანი აფხაზური ვაზის ჯიშების განვითარება იყო.

არძინბს მტკიცებით, ლუკასი სადაზვერვო ინფორმაციის შეგროვებით იყო დაკავებული. მისივე იფორმაციით, ის ადრე საფრანგეთის თავდაცვის სამინისტროში მუშაობდა და ასევე მსახურობდა საფრანგეთის სამხედრო ატაშედ თბილისში.
არძინბას განცხადებით, ლუკასის ქმედება აფხაზეთის ეროვნული უსაფრთხოებისთვის პირდაპირ საფრთხედ განიხილება.

"ამასთან დაკავშირებით მიღებულია შემდეგი გადაწყვეტილება: აკრძალოს ამ პროექტის განხორციელება გაერთიანებულ რუსულ ბაზასთან, რომელიც ჩვენი უსაფრთხოების გარანტიაა", - განაცხადა მან.

არძინბას ინფორმაციით, ლუკასმა აფხაზეთის ტერიტორია უკვე დატოვა. ის დასძენს, რომ "აფხაზეთში მომუშავე" საერთაშორისო ორგანიზაციები მის "სახელმწიფოებრივ სუვერენიტეტს არ აღიარებენ".

"ჩვენ მათ ვუჩვენებთ, რა არის აფხაზეთის სახელმწიფო", - განაცხადა მან.

მიმართვაში არძინბამ თქვა, რომ მხარს უჭერს არასამთავრობო ორგანიზაციების საქმიანობის მარეგულირებელი კანონის შემუშავებისა და მიღების იდეას.

"ეხო კავკაზას" თანახმად, FAO-ს ევროპისა და ცენტრალური აზიის რეგიონულ წარმომადგენლობაში ამ ეტაპზე ამ საკითხთან დაკავშირებით კომენტარს არ აკეთებენ.

ინალ არძინბამ მაისში დახურა საერთაშორისო ორგანიზაცია "მოძრაობა შიმშილის წინააღმდეგ" პროექტი, რომელიც უკავშირდება ადგილობრივი მმართველობის გაუმჯობესებას ინკლუზიური განვითარების გზით.

მაშინ "საგარეო უწყებაში" განაცხადეს, რომ "უშიშროების სამსახურთან" ერთად გამოავლინეს ფაქტები, რომლებიც პროექტის შესახებ მოწოდებულ მონაცემებსა და მის ფარგლებში ჩატარებულ აქტივობებს შორის შეუსაბამობაზე მიუთითებდნენ.

კერძოდ, არძინბამ თქვა, რომ მათთვის მიუღებელია ის პროექტები, რომლებიც აფხაზებისა და ქართველების პირდაპირ დიალოგს უწყობს ხელს, მათ შორის, ექსპერტებისა და ახალგაზრდობის ჩართულობით.

31 წლის ინალ არძინბა აფხაზეთის დე ფაქტო რესპუბლიკის საგარეო საქმეთა მინისტრად 2021 წლის ნოემბერში დაინიშნა.

არძინბა რუსეთის პრეზიდენტის ადმინისტრაციის თანამშრომელი იყო, 2014-2018 წლებში ის "დსთ-ს ქვეყნებთან, აფხაზეთთან და სამხრეთ ოსეთთან სოციალურ-ეკონომიკური თანამშრომლობის დეპარტამენტში" მუშაობდა, სადაც უკრაინის განყოფილებას, დონეცკისა და ლუგანსკის თვითგამოცხადებულ რესპუბლიკებთან ურთიერთობას კურირებდა.

ხელმძღვანელობდა რუსეთის პატრიარქ კირილესთან არსებულ ახალგაზრდულ საქმეთა საზოგადოებრივ საბჭოს.