ოკუპირებული აფხაზეთის ე.წ პრეზიდენტის ადმინისტრაციის ხელმძღვანელი და ე.წ საგარეო საქმეთა მინისტრი თანამდებობებიდან გადადგნენ. ამის შესახებ ინფორმაციას რუსული სააგენტო "ინტერფაქსი" ავრცელებს.

,,ინტერფაქსის'' ცნობით, დაკავებული თანამდებობიდან გათავისუფლების შესახებ განცხადება ინალ არძინბამ ორშაბათს, 4 სექტემბერს დაწერა, თუმცა ე.წ პრეზიდენტს, ასლან ბჟანიას განცხადებაზე ხელი არ მოუწერია.

თვითგამოცხადებული რესპუბლიკის მეთაურის პრესსამსახურზე დაყრდნობით, სააგენტომ ე.წ პრეზიდენტის ადმინისტრაციის ხელძღვანელის, ჯანსუღ ნანბას თანამდებობიდან გადადგომის შესახებაც გამოაქვეყნა ინფორმაცია.

"4 სექტემბერს, ე.წ. პრეზიდენტის ადმინისტრაციის ხელმძღვანელმა, ჯანსუღ ნანბამ, პირადი განცხადების საფუძველზე, დაკავებული თანამდებობიდან გათავისუფლების შესახებ განცხადება დაწერა", - განაცხადა მარიანა კვიცინიამ, რომელიც ოკუპირებული აფხაზეთის ე.წ. პრეზიდენტის პრესმდივანია.

კრემლის მიერ კონტროლირებულ სააგენტო „ინტერფაქსში''  განმარტავენ, რომ ასლან ბჟანიამ უკვე ხელი მოაწერა ნანბას გათავისუფლების შესახებ ბრძანებას.

ნანბა ოკუპირებული აფხაზეთის დე ფაქტო ფინანსთა მინისტრი იყო, 2022 წლის აგვისტოდან კი ე.წ პრეზიდენტის ადმინისტრაციის ხელმძღვანელი გახდა.

ინალ არძინბა ე.წ აფხაზეთის რესპუბლიკის საგარეო საქმეთა მინისტრის პოსტს 2021 წლის ნოემბრიდან იკავებდა, ხოლო იქამდე რუსეთის პრეზიდენტის ადმინისტრაციის თანამშრომელი იყო.


ამავე თემაზე:

ასლან ბჟანიამ ინალ არძინბას "უმაღლესი დიპლომატიური რანგი" მიანიჭა