წალენჯიხის კულტურის სახლში მერის გია ხარჩილავას ორგანიზებით “ვარდების რევოლუციის” 20 წლისთავთან დაკავშირებით შეხვედრა გაიმართა, სადაც შეკრებილებს სიტყვით გამომსვლელებმა მიმართეს.
![](/images/temp/2023/11/22/e00240d9e9768b419184c54a1af538a7.jpg)
მათ შორის პირველი სწორედ ხარჩილავა იყო, რომელმაც 2003 წლის მოვლენების დროს წალენჯიხის როლზე ისაუბრა და აღნიშნა, რომ ამ მუნიციპალიტეტს, როგორც ერთადერთ ოპოზიციურს, ახლაც განსაკუთრებული ფუნქცია აქვს.
„დღეს ჩვენ ავღნიშნავთ „ვარდების რევოლუციის“ 20 წლისთავს, რომელიც დაიწყო წალენჯიხიდან და მიხეილ სააკაშვილი სწორედ წალენჯიხიდან გაუძღვა მთელ კოლონას და მთელი ქართველი ერის მობილიზაციას, სულიერ ამბოხს იმ პერიოდის, შევარდნაძის რეჟიმის წინააღმდეგ. ვარდების რევოლუციას მოყვა რეფორმების მთელი ტალღა. სახელმწიფო შეიცვალა, ჩამოყალიბდა და ამ მხრივ, მიშა სააკაშვილი არის სახელმწიფოს დამფუძნებელი და ერთ-ერთი დიდი მამათაგანი. ჩვენ მივიღეთ სახელმწიფო, რომელიც საინტერესო გახდა ევროპისთვის, ნატოსთვის. ჩვენ გვქონდა ძალიან მაღალი თავსებადობა ნატოსთან და ჩვენი კანონმდებლობა ახლოს მივიყვანეთ ევროკავშირთან. სწორედ ამას მოყვა ევროკავშირის ასოცირების ხელშეკრულება. ბოლო 30 წლის განმავლობაში არავის გაუკეთებია იმდენი ევროინტეგრაციისთვის, რამდენიც მიხეილ სააკაშვილს. ჩვენ ვართ ახალ ეტაპზე, იმედია, ძალიან მალე მივიღებთ ევროკავშირის კანდიდატის სტატუსს, შემდეგ უნდა გადავიდეთ მოლაპარაკებების ეტაპზე, მაგრამ ჩადებული გვაქვს ცხრა პუნქტიანი მოთხროვნა. "ქართული ოცნება" ამ ცხრა პუნქტიანი მოთხოვნის შემსრულებელი არ არის, ის, პირიქით, ანგრევს ყველაფერს, რაც გვაკავშირებს ევროპასთან და ევროკავშირთან, ამიტომ აუცილებელია ხელისუფლების ცვლილება და იმ გუნდით ჩანაცვლება, რომელმაც ერთხელ უკვე ძალიან ახლოს მიიყვანა ქვეყანა ევროკავშირთან და მეორედ, უკვე მის ღირსეულ წევრს გახდის“- აღნიშნა საუბრისას წალენჯიხის მერმა გიორგი ხარჩილავამ.
![](/images/temp/2023/11/22/45766cdc8076e26968634293c9b9b4bc.jpg)
დამსწრეებს მიმართეს იმ ცნობილი ავტობუსის მგზავრებმა, რომელიც 20 წლის წინ წალენჯიხიდან თბილისისკენ მიხეილ სააკაშვილთან ერთად დაიძრნენ. რამინ გოგოხიამ, რომელიც მაშინ “ერთიანი ნაციონალური მოძრაობის” ადგილიბრივ ორგანიზაციას ხელმძღვანელობდა, იმ სულისკვეთებაზე ისაუბრა, რაც მაშინ ხალხსა და პარტიას ამოძრავებდა. გოგოხია მიიჩნევს, რომ ახლა ენმ-ში დაპირისპირება მხოლოდ მმართველი ძალის ინტერესებში შედის და გამოსავალს ერთიანობაში ხედავს.
“ყველაფერი იბადება, იზრდება, ვითარდება, აღწევს თავის უმაღლეს წერტილს, მერე ქრება, კვდება და ეს პარტიებსაც ეხება. „ნაციონალურმა მოძრაობამ“ გააკეთა უდიდესი საქმე, მან დაამარცხა რუსული ხელისუფლება და შექმნა სახელმწიფო სტრუქტურები, ფაქტობრივად, ხელახლა შექმნა სახელმწიფო, ეს ერთი პარტიისათვის ცოტა არ არის. ეტყობა, ეს იყო მისი მაქსიმუმი და არც მიკვირს, რომ რაღაც წინააღმდეგობებია. არ უნდა იყოს ასე, იმედგაცრუებაა, მაგრამ თავს იმით ვიმშვიდებ, რომ ეს ყველაფერი ბუნებაში ხდება", - აღნიშნა ყოფილმა "ერთიანი ნაციონალური მოძრაობის" ადგილობრივი ხელისუფლების ხელმძღვანელმა რამინ გოგოხიამ.
![](/images/temp/2023/11/22/825b069acd1a74c6b33adf08c388d3fb.jpg)
შეხვედრაზე ძველი კადრები და ფოტოებიც აჩვენეს, მოუსმინეს სააკაშვილის ჩანაწერებსაც.
ხვალ, 23 ნოემბერს “ვარდების რევოლუციის” 20 წლისთავია. ამ დღეს მრავალათასიანი მიტინგებისა და პროტესტის შემდეგ საქართველოს პრეზიდენტი ედუარდ შევარდნაძე გადადგა. მოგვიანებით, არჩევნების შემდეგ ხელისუფლებაში “ენმ” მოვიდა.
მასალის გამოყენების პირობები