აფხაზეთის თვითგამოცხადებული რესპუბლიკის ე.წ. საგარეო საქმეთა სამინისტრომ რუსული რესტორნების ქსელის „ვკუსნო ი ტოკას“ (გემრიელია და წერტილი) გენერალური დირექტორის ოლეგ პაროევის განცხადება გააკრიტიკა.

სოხუმში მიაჩნიათ, რომ პაროევმა „თავს პოლიტიკური ხასიათის განცხადებების გაკეთების უფლება მისცა“, როდესაც განაცხადა, რომ „აფხაზეთი საერთაშორისო ასპარეზზე საქართველოს კუთვნილ ტერიტორიად ითვლება“.

„აფხაზეთის რესპუბლიკა არის რუსეთის ფედერაციის მიერ აღიარებული სუვერენული სახელმწიფო, რომლის ტერიტორიაზე რეგისტრირებული და მოქმედი იურიდიული პირია კომპანია „ვკუსნო ი ტოჩკა“. ზემოაღნიშნული კომპანიის შესაძლო კომერციული და სამართლებრივი შეზღუდვები უცხო ქვეყნებში საქმიანობის წარმართვასთან დაკავშირებით, არ არის რუსეთის ფედერაციის სტრატეგიული პარტნიორის მისამართით არასწორი და უყურადღებო განცხადებების გაკეთების საფუძველი ან გამართლება“, - ნათქვამია განცხადებაში.

„საგარეო“ უწყება „მტკიცედ ურჩევს“ პაროევს, მომავალში თავი აარიდოს „არასწორ პოლიტიკურ განცხადებებს აფხაზეთის რესპუბლიკის საერთაშორისო სამართლებრივი სტატუსის შესახებ“.

ცოტა ხნის წინ, ცნობილი გახდა, რომ სოხუმში სწრაფი კვების რუსული რესტორნების ქსელი „ვკუსნო ი ტოჩკა“ ("გემრიელია და წერტილი") არ გაიხსნება. ამის შესახებ კვების ობიექტების გენერალურმა დირექტორმა ოლეგ პაროევმა განაცხადა. მან მიზეზად კი „რესპუბლიკის ტერიტორიული კუთვნილების საკითხთან დაკავშირებით კონფლიქტის რისკი“ დაასახელა.

„ჩვენ ყურადღებით შევისწავლეთ აფხაზეთის ბაზარი და მივედით დასკვნამდე, რომ იქ არ გავხსნით. ამას რამდენიმე მიზეზი აქვს: ერთი მხრივ, აფხაზეთი საერთაშორისო ასპარეზზე ითვლება საქართველოს კუთვნილ ტერიტორიად და იქ ფუნქციონირებს McDonald's - ის ფრანშიზა და ჩვენ არ გვინდა კონფლიქტის შექმნა“, - აღნიშნა პაროევმა. მისივე თქმით, უფრო მომგებიანი და ადვილია ქსელური რესტორნის გახსნა „აფხაზეთის საზღვართან ახლოს“.

ინფორმაცია იმის შესახებ, რომ რუსეთში McDonald's - ის ნაცვლად გახსნილი სწრაფი კვების რესტორნების ქსელს "ვკუსნო - ი ტოჩკა" - ს აფხაზეთის დე ფაქტო რესპუბლიკაში შესვლა სურს, ჯერ კიდევ 2022 წელს გავრცელდა.