წალენჯიხაში, არტმეურნეობის პარკში, რიგით მესამე ლიტერატურული ფესტივალი ,,გრანელი’’ საქართველოს და ევროკავშირის ჰიმნებით გაიხსნა.
ორდღიან ღონისძიებაში ცნობილი ავტორები მონაწილეობენ, მათ შორის არის რატი ამაღლობელი, დათო ტურაშვილი, ირაკლი კაკაბაძე და ა.შ.

ფესტივალის სტუმრებს და მონაწილეებს მიმართა ლელოს ლიდერმა მამუკა ხაზარაძემ

,,ჩემთვის ძალიან სასიხარულოა, რომ უკვე მესამე წელია წალენჯიხაში ასეთი მნიშვნელოვანი ღონისძიება ენთუზიაზმით ტარდება და მინდა ვისარგებლო შემთხვევით და მადლობა გადავუხადო გამომცემლებს, მკითხველებს და ყველა ვინც ამ ფესტივალს გგულშემატკივრობ, მე ვფიქრობ ძალიან მნიშვნელოვანია მსგავსი ღონისძიება განსაკუთრებით ჩვენი მომავალი თაობისთვის. წალენჯიხა უკვე ნამდვილად არის საქართველოს საინფორმაციო ველზე ,,ტოპ ნიუსებში'' პირველ ათეულში არის სხვადასხვა კუთხით წარმოჩენილი, ეს ძალიან მნიშვნელოვანია ცნობადობისთვის, ეს არის ძალიან მნიშვნელოვანი იმ საქმისთვის, რომელსაც სულ რაღაც, რამდენიმე კილომეტრი გვაშორებს საოკუპაციო ხაზით და ეს პროგრამები გაგრძელდება’’, - განაცხადა მამუკა ხაზარაძემ.

სიტყვით მიმართვისას, ლიტერატურული პროგრამის კურატორმა თეონა დოლენჯაშვილმა აღნიშნა, რომ პროგრამა მრავალფეროვანია და აქ წარმოდგენილი წიგნები პასუხობენ სწრაფვას ევროპისკენ.

,,ამ პროგრამაში ვეცადეთ, რომ გაერთიანებულიყო ის ბრძოლის ისტორია, რომელიც საქართველოს არა მხოლოდ ბოლო 30 წლის განმავლობაში აქვს, არამედ თავისუფლებისთვის ბრძოლის ისტორია, ალბათ დაფუძნებიდან დღემდე და ამავე დროს ის ევროპული და ეროვნული ღირებულებები, რომელიც ასეთი მნიშვნელოვანია ჩვენი ქვეყნისთვის. ყველა ეს წიგნი ,,ირიბად'' თუ ,,პირდაპირ'' პასუხობს ჩვენს მისწრაფებებს, ჩვენს სწრაფვას ევროპისკენ, თუნდაც იმას, რაც დღეს ხდება ამასაც ეხმაურება. ეს არის ლიტერატურული დღესასწაული, ვფიქრობ დღეს ჩვენ გვექნება ერთგვარი თავისუფლების დღესასწაული, იმიტომ რომ ჩვენ ქართველ ავტორებს ამ რეჟიმის პირობებში ძალიან მოგვაკლდა ასეთი ფესტივალები და დიდი მადლობა ყველას’’, - მიმართა დამსწრეებს თეონა დოლენჯაშვილმა.

ღონისძიების ფარგლებში ორი დღის განმავლობაში ჩატარდება წიგნების გამოფენა - გაყიდვა, გაიმართება წიგნის პრეზენტაციები, მათ შორის, შეხვედრები თანამედროვე ქართველ და უკრაინელ მწერლებთან.

დღეს ფესტივალზე გრანელის პრემიის ლაურეატები გამოვლინდებიან. ლიტერატურული ფესტივალი ხვალ, 30 ივნისს დასრულდება.

წალენჯიხის მუნიციპალიტეტის მერიის ცნობით, ფესტივალი ხორციელდება „ხაზარაძეების ფონდი კულტურისთვის“ მხარდაჭერით და ორგანიზებით წალენჯიხის მუნიციპალიტეტის მერიასთან და „წალენჯიხის განვითარების ფონდთან“ თანამშრომლობით.

ცნობისთვის წალენჯიხაში სამდღიანი ლიტერატურული ფესტივალი პირველად 2022 წელს გაიმართა.