“საერთაშორისო გამჭვირვალობა-საქართველოს” ახალი კვლევის მიხედვით, სხვადასხვა საგზაო კომპანია სახელმწიფო შესყიდვებიდან მსხვილ კონტრაქტებს იღებს, მათი ნაწილი კი მოქმედ ან ყოფილ თანამდებობის პირებთანაა დაკავშირებული.

ორგანიზაციის ინფორმაციით, იმ კომპანიებმა, რომლებიც რეგიონში ოპერირებენ 2013 წლიდან დღემდე სახელმწიფო შესყიდვებიდან ჯამში 676,623,524 ლარის კონტრაქტები მიიღეს.

აქვე მითითებულია, რომ კვლევაში სამეგრელო-ზემო სვანეთის ცალკეულ მუნიციპალიტეტებში კომპანიათა ნაწილის ჩართულობა პროცესის კანონიერებასთან დაკავშირებით აჩენს ეჭვებს.

ერთ-ერთია შპს “როუდ პლიუსი” და შპს “ბილდინგ გრუპ 17”, რომელიც ორგანიზაციის თქმით, ზუგდიდის მერის, მამუკა წოწერიასა და სამეგრელო-ზემო სვანეთის მხარეში სახელმწიფო რწმუნებულის მოადგილის, დავით კუხალეიშვილის კლასელთან და მეგობართან, ზაზა ანთიასთან დაკავშირებული კომპანიებია.

„ამ კომპანიებმა 2018 წლიდან დღემდე, ჯამში 28,516,914 ლარის ტენდერები მოიგეს. აქედან 15,314,019 ლარის შესყიდვები ზუგდიდის მერიაზე მოდის. ამ შესყიდვებში არსებულ კორუფციულ რისკებზე “საერთაშორისო გამჭვირვალობა- საქართველო” გასულ წელს წერდა.

შპს “როუდ პლიუსი” 2020 წელს დარეგისტრირდა. მისი 100% წილის მფლობელი და დირექტორი თავად ზაზა ანთიაა. კომპანია 2021 წლიდან დღემდე 58 ტენდერში მონაწილეობდა და 23 შემთხვევაში გაიმარჯვა. მიღებული ხელშეკრულებების ჯამური ღირებულება 16,451,079 ლარია, საიდანაც 6,920,049 ლარი ზუგდიდის მერიაზე მოდის. ამ 23 მოგებული ტენდერიდან 13-ში კომპანიას კონკურენტი არ ჰყოლია, 4 ტენდერი კონკურენტების დისკვალიფიკაციის შედეგად მოიგო.

2017 წელს რეგისტრირებული შპს “ბილდინგ გრუპ 17”-ის 100% წილის მფლობელი და დირექტორი ზაზა ანთიას დედა, აზა ჩიხლაძეა, სატენდერო დოკუმენტაციას კი ხელს აწერს სწორედ ზაზა ანთია, როგორც მინდობილი პირი. შპს “ბილდინგ გრუპ 17” ტენდერებში 2018-2021 წლებში მონაწილეობდა, ჯამში 74 ტენდერიდან 32-ში გაიმარჯვა, ხელშეკრულებათა ჯამურმა ღირებულებამ კი 12,005,725 ლარი შეადგინა, საიდანაც 8,333,860 ლარის ხელშეკრულებები ზუგდიდის მერიაზე მოდის. შპს “ბილდინგ გრუპ 17”-მა ზუგდიდის მერიისგან ასევე 60,110 ლარის ორი გამარტივებული შესყიდვა მიიღო. 32 მოგებული ტენდერიდან 20-ში კონკურენტი არ ჰყოლია, 6 ტენდერში კი კონკურენტების დისკვალიფიკაციის ხარჯზე გაიმარჯვა“, - მითითებულია ინფორმაციაში.

„TI - საქართველო“ მოუწოდებს სახელმწიფო უსაფრთხოების სამსახურის ანტიკორუფციულ სააგენტოს, შეისწავლოს თითოეული შესყიდვა და დაადგინოს, შეიცავს თუ არა კორუფციის ნიშნებს.