აფხაზეთის დე ფაქტო რესპუბლიკის ე.წ პარლამენტში „აპარტამენტების“ შესახებ კანონპროექტის განხილვა, შესაძლებელია, ივლისის ბოლოს, დაჩქარებული წესით მოხდეს, ამის შესახებ აფხაზმა „დეპუტატმა“ კან კვარჩიამ განაცხადა.

მისი თქმით, ეს დაზუსტებული ინფორმაციაა, რომლის თანახმადაც, დე ფაქტო პრეზიდენტს, ასლან ბჟანიას ე.წ. კანონპროექტის წარდგენა „აღმოსავლეთ აფხაზეთის განვითარების“ საბაბით სურს.

„ბატონი ბჟანია ვერაფრით დაშოშმინდა. მესმის, რომ მას გარკვეული ვალდებულებები აქვს, ასე ვთქვათ, ოლიგარქიული გაერთიანების გარკვეული ძალების წინაშე. ეს არის სქემა, სადაც მხოლოდ ზოგიერთი ადამიანი მდიდრდება და სახელმწიფო რჩება ამ პროცესების მიღმა. პრეზიდენტის ხრიკი ახლა იმაში მდგომარეობს, რომ მას სურს წარადგინოს ეს კანონპროექტი არა მთლიანად, არამედ თითქოსდა, აფხაზეთის აღმოსავლეთ ნაწილის განვითარებისთვის“, - დაწერა კვარჩიამ ტელეგრამ არხზე.

„დეპუტატი“ მოუწოდებს მათ, ვინც შეცდომაში შეიყვანეს, გამოფხიზლდნენ, რადგან, მისი თქმით, ეს არის შენიღბული სქემა, დე ფაქტო რესპუბლიკაში უძრავი ქონების მისაღებად, „რაც ეთნიკურ აფხაზებში დემოგრაფიულ რეგრესს გამოიწვევს“.

„აპარტამენტების მშენებლობა აფხაზეთის აღმოსავლეთ და დასავლეთ ნაწილებად დაყოფას ნიშნავს. ხვალ ეს აისახება აფხაზეთის სოციალური ცხოვრების ყველა ფენაზე. ყველას შეეხება. ჩვენ ყველა ერთად უნდა დავდგეთ ვუთხრათ პრეზიდენტს „არა“, - აღნიშნა კვარჩიამ.

ინფორმაციისთვის, "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი აფხაზი ლიდერი ასლან ბჟანიაა.

ბჟანიამ მიმდინარე წლის აპრილში განცახადა, რომ „აპარტამენტების შესახებ კანონი ინვესტორებს კი არა, აფხაზეთის მცხოვრებლებს სჭირდებათ“. 

მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები.ოპონენტები მიიჩნევენ, რომ ეს არის უძრავი ქონების გაყიდვის ფარული ფორმა.

მათივე განმარტებით, "კანონის" მიღების შემთხვევაში, "აფხაზეთში 100 ათასამდე ადამიანს შეუძლია დასახლება".

ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა).

ამავე თემაზე:

სოხუმში ორწლიანმა პროტესტმა ოდიოზური კანონების პარალიზება მოახდინა, ახლა ბურთი ენგურს გაღმაა - აფხაზი ვეტერანი „აგენტების“ წინააღმდეგ ქართულ პროტესტზე

აფხაზები დარჩებიან უმცირესობაში, შემდეგ კი საერთოდ გაქრებიან, - აქტივისტები „აპარტამენტების“ კანონზე 

არძინბამ "აპარტამენტების შესახებ კანონის" კრიტოკოსების განცხადებებს "იდიოტური" უწოდა

სოხუმში აპარტამენტების კანონის ამოქმედების და ანექსიის საფრთხეებზე - DRI