შინაგან საქმეთა სამინისტროს ცენტრალური კრიმინალური პოლიციის სამეგრელო-ზემო სვანეთისა და სხვა რეგიონების თანამშრომლებმა ნარკოდანაშაულის ბრალდებით 28 პირი, მათ შორის 16 ნარკორეალიზატორი დააკავეს. ამის შესახებ ინფორმაცია სამინისტრომ საკუთარ ვებ გვერდზე გაავრცელა.

ამავე ცნობით, დაკავებულები როგორც საქართველოს, ასევე, უცხო ქვეყნის მოქალაქეები არიან.

"სამართალდამცველების მიერ ნივთმტკიცებად სხვადასხვა სახის დიდი და განსაკუთრებით დიდი ოდენობით ნარკოტიკული საშუალებებია ამოღებული. პოლიციამ ნარკოტიკების უკანონო გასაღების ბრალდებით დაკავებული პირებისგან, მოსამართლის განჩინების საფუძველზე, რამდენჯერმე განახორციელა ნარკოტიკების საკონტროლო შესყიდვა და აღნიშნული შესყიდვების ფარული აუდიო-ვიდეო ჩაწერა", - განმარტავს სამინისტრო.

მათივე ინფორმაციით, სამართალდამცველებმა ნარკოდანაშაულის ბრალდებით დაკავებული პირების პირადი და საცხოვრებელი სახლების ჩხრეკისას, ასევე, მათ მიერ მითითებული ლოკაციებიდან სხვადასხვა სახის განსაკუთრებით დიდი ოდენობით ნარკოტიკული საშუალებები, მათ შორის: "კოკაინი", "ჰეროინი" "ალფა პვპ", "მეტადონი", "მდმა", "მეფედრონი", "ლიზერგიდი", "კეტამინი", "ბუპრენორფინი", "სუბოტექსი", "ექსტაზი", "მეტამფეტამინი", "მარიხუანა" და ნარკოტიკულ საშუალების შემცველი მცენარე "კანაფი" ნივთმტკიცებად ამოიღეს.

გარდა ამისა, საგამოძიებო მოქმედებების შედეგად, ამოღებულია, სავარაუდოდ, ნარკოტიკების რეალიზაციის შედეგად მიღებული ფული და ელექტრო სასწორები.

გამოძიება საქართველოს სისხლის სამართლის კოდექსის 260-ე, 261-ე, 262-ე, 265-ე, 18-260-ე, 19-260-ე, 273-ე პრიმა და 19-273-ე პრიმა მუხლებით მიმდინარეობს.

დანაშაულები 20 წლამდე ან უვადო თავისუფლების აღკვეთას ითვალისწინებს.