ოჩამჩირის რაიონული სასამართლოდან მილიციელებმა სასამართლოს განაჩენის გამოცხადებაც კი არ აცალეს პროკურატურის წარმომადგენლებთან ფიზიკური დაპირისპირები შემდეგ, ბრალდებული დარბაზში შეყვანამდე გაიტაცეს, წერს „ეხო კავკაზა“.

საბოლოოდ, ბრალდებული მილიციის რაიონულ განყოფილებაში აღმოჩნდა.

მომხდარის შესახებ, თავდაპირველად, აფხაზურმა ტელეგრამ არხებმა გაავრცელეს ინფორმაცია. სააგენტო „აიაშარამ“ სასამართლოს შენობასთან ჩხუბის მოკლე ვიდეო გამოაქვეყნა, სადაც ჩანს მილიციის ფორმაში გამოწყობილი ადამიანების ჯგუფი, რომლებიც სამოქალაქო ფორმაში გამოწყობილებს უპირისპირდება. 

ადგილობრივები ამბობენ, რომ ვოუბა სასამართლოს კართან, პირდაპირ პროკურატურის წარმომადგენლებს გამოსტაცეს ხელიდან.

ამავე ინფორმაციით, ბრალდებულ ვოუბას ე.წ. პროკურატურა სამართალდამცველების მიმართ დაუმორჩილებლობაში ადანაშაულებდა და სასამართლოზე დაკავებულისთვის შინაპატიმრობის შეფარდებას ითხოვდა. მაგრამ ოჩამჩირის ე.წ.-მა მილიციამ ბრალდებულთან ანგარიშსწორება თავად გადაწყვიტა, სასამართლოსა და პროკურატურის უფლებების სრული იგნორირებით.

„ჰყავთ [ოჩამჩირის რაიონულ მილიციაში] მე-4 სართულზე. ვოუბას ნათესავებმა არაფერი იციან მისი მდგომარეობის შესახებ, რადგან მასთან შესვლის უფლებას არ აძლევენ ადვოკატებს“, - წერდა „აიაშარა“ 31 ივლისს.

იმავე დღეს, მოგვიანებით, დე ფაქტო რესპუბლიკის ადამიანის უფლებათა რწმუნებულმა, ანას ქიშმარიამ ადგილობრივ მედიას უთხრა, რომ „ადვოკატი დაკავებულთან დაუშვეს და მიმდინარეობს სიტუაციის შესწავლა".

„სრული განუკითხაობაა“, - წერენ კომენტატორები სოციალურ ქსელებში.

"რას უნდა მოელოდე მათგან, ვინც ნარკოტიკებს საკუთარ ხალხზე ასაღებს".
"წაიყვანეს, რომ მერე ჯგუფურად სცემონ განყოფილებაში,
რას დაამსგავსეს ქვყანა, სრული ქაოსია".
"ვთქვათ, რომ ძველბიჭურად ვცხოვრობთ და ნუ მოგვაქვს თავი, რომ თითქოს კანონს ვემორჩილებით".
"ასეთები სჭირდებათ სისტემაში და ასეთებს ასაქმებენ".
"სრული დეგრადაცია".
"არავინ იცის თავისი უფლებები, რაღაც ბრძოლაა წესების გარეშე".
"არეულობაა ყველგან და ყველაფერში".
"მთლად ჭკუიდან შეიშალნენ. ფსკერი".

ანალოგიურ დასკვნამდე მიდის სააგენტო „აიაშარა“, რომლის მტკიცებით, ეს არ არის პოლიციელების დაუსჯელობის პირველი შემთხვევა:

„გავიხსენოთ შემთხვევა, როდესაც დედაქალაქის პოლიციის კრიმინალური გამოძიების სამმართველოს უფროსმა, ალფრედ ნარმანიამ დაკავებულს სასამართლო დარბაზში სცემა და სასამართლო პროცესის შეწყვეტის შემდეგ საქალაქო სამმართველოში გადაიყვანა. ან ის შემთხვევა, როდესაც იგივე ალფრედ ნარმანიამ სცემა დაკავებული დაკავებული სოხუმის პროკურატურაში დაკითხვის დროს. შემდეგ გავიგეთ ახალი რაიოანი მილიციის თანამშრომლების ამბავი, რომლებმაც განყოფილებაში სცემეს დაკავებული და ეს მოქმედება ტელეფონზე გადაიღეს. რომელი მათგანი დაისაჯა? მართალია, არავინ. სწორედ ამიტომ, ფაქტობრივად, ოჩამჩირის პოლიცია თავს უფლებას აძლევს მოქალაქეებზე თავდასხმას, რადგან იციან, რომ ამ ქმედებებისთვის მათ არავინ დასჯის. პირიქით, შესაძლოა, წოდებით დააწინაურონ, სერთიფიკატი ან პრემია მიენიჭონ კარგად შესრულებული სამუშაოსთვის“.

დე ფაქტო რესპუბლიკის შინაგან საქმეთა სამინისტროში ოჩამჩირელი მილიციელების მონაწილეობით მომხდარი ინციდენტი დაადასტურეს და ადგილობრივ მედიას უთხრეს, რომ ე.წ. მინისტრის, რობერტ კიუტის მიერ „დანიშნულია სამსახურებრივი შემოწმება“ და, რომ ამ შემოწმებას „საკუთარი უსაფრთხოების სამსახური“ აწარმოებს.

ამავე თემაზე:

სოხუმელი მილიციელის წინააღმდეგ ე.წ. პროკურატურამ ძალადობის ფაქტზე საქმე აღძრა

სოხუმელი მილიციელი, რომელმაც მოქალაქეს სცემა, სამსახურიდან „უარყოფითი მოტივებით“ გაათავისუფლეს, - მედია

გალში ცემის შედეგად გარდაცვლილი თემურ კარბაიას საქმეზე დაკავებული მილიციელები პატიმრობიდან გაათავისუფლეს