ძალადობისა და ჟურნალისტისთვის პროფესიულ საქმიანობაში  ხელის შეშლაში ბრალდებული ვიტალი გუგუჩია, რომელსაც სასამართლომ 5000 ლარიანი გირაო შეუფარდა, რადიო "ათინათთან" ამბობს, რომ მას დანაშაული არ ჩაუდენია, რასაც მისი თქმით, ვიდეო კადრებიც ადასტურებს.

"ის სამართლებრივი დევნა, რაც ჩემს წინააღმდეგ მიმდინარეობს ჩვეულებრივი ცირკია. არანაირი დანაშაული მე არ ჩამიდენია და ეს საჯაროდ გავრცელებული ვიდეო კადრებიდან ძალიან კარგად ჩანს, მაგრამ სისტემა ასე მუშაობს. ამას საბჭოთა სისტემა ჰქვია. ეს ადამიანების დაშინების, მათი შეჩერების და დაბრკოლების მიზნით კეთდება. ბრალი ორი მუხლით წამიყენეს, ძალადობა და ჟურნალისტურ საქმიანობაში ხელის შეშლა, რომელთაგან მე არცერთი არ ჩამიდენია. აღკვეთის ღონისძიების სახით კი გირაო შემიფარდეს, რაც იმას ნიშნავს, რომ გირაოს დარღვევის შემთხვევაში, ანუ, თუ კი ჩავიდენ ახალ დანაშაულს ან დავემალები გამოძიებას, მათ შეუძლიათ აღკვეთის ღონისძიება უფრო დამიმძიმონ და პატიმრობა შემიფარდონ. რაც შეეხება გირაოს, თანხა ნახევარ საათში შეგროვდა და დავწერე კიდეც, რომ მეტი აღარ დაერიცხათ გაოგნებული ვიყავი", - განმარტავს ის.

ის, ასევე, აღნიშნავს, რომ გააგრძელებს აქტივისტურ საქმიანობას და როგორც პარტია "გირჩი - მეტი თავისუფლების" პოლიტსაბჭოს წევრი, საარჩევნო პროცესშიც ინტენსიურად ჩაერთვება.

შეგახსენებთ, ზუგდიდის რაიონული სასამართლოს გადაწყვეტილებით, ვიტალი გუგუჩიას, რომელსაც ბრალად "პოსტ ტვ" - ის ჟურნალისტისთვის პროფესიულ საქმიანობაში უკანონოდ ხელის შეშლა და ძალადობა ედებოდა, 5000 ლარის ოდენობის გირაო დღეს, 6 აგვისტოს შეეფარდა.

ინფორმაციისთვის, მას შემდეგ, რაც 28 მაისს, საკანონმდებლო ორგანომ "აგენტების კანონზე" პრეზიდენტის ვეტო დაძლია, ერთ-ერთმა აქტივისტმა პარლამენტიდან მომავალი დეპუტატების კოლონას აგინა. დეპუტატი ვიქტორ ჯაფარიძე ავტომობილიდან გადმოვიდა, გუგუჩიას და მისი ცოლის მაღაზიის გარე დახლიდან ფორთოხალი აიღო და ამ მოქალაქეს ესროლა. 29 მაისს, კი ქართული ოცნების დეპუტატი მაღაზიაში ბოდიშის მოსახდელად და ზარალის ასანაზღაურებლად დაბრუნდა, თუმცა მეპატრონემ უპასუხა - "ფორთოხალი პრობლემა არ არის, თქვენ მომავალი წაგვართვით".

აღნიშნულ ფაქტზე კომენტარის მისაღებად "პოსტ ტვ"-ის ჟურნალისტი ნათია ბერიძე სამეგრელოში, გუგუჩიას საცხოვრებელ სახლთან მივიდა, რის შემდეგაც, მათ შორის სიტყვიერი დაპირისპირება მოხდა.


ამავე თემაზე: 

სასამართლომ ვიტალი გუგუჩიას აღკვეთის ღონისძიების სახით 5 000 ლარიანი გირაო შეუფარდა

პროკურატურამ ვიტალი გუგუჩიას ჟურნალისტისთვის პროფესიულ საქმიანობაში უკანონოდ ხელის შეშლისა და ძალადობის ფაქტზე ბრალდება წარუდგინა

ვიტალი გუგუჩია პროკურატურამ ბრალის წასაყენებლად დაიბარა