დღეს, 12 აგვისტოს ზუგდიდის მუნიციპალიტეტის საკრებულოში კვორუმი შედგა. ადგილობრივ წარმომადგენლობით ორგანოში, სამთვიანი ბოიკოტის შემდეგ, "ქართული ოცნების" წევრები გამოცხადდნენ და კენჭისყრაზე რეგისტრაცია გაიარეს, თუმცა მათ მიერ დაინიციირებული საკითხები, რომელიც მუნიციპალიტეტის საკრებულოს თავმჯდომარის გიგა ფარულავას და მისი მოადგილეების იმპიჩმენტს ეხებოდა, ჩავარდა.

სხდომის დღის წესრიგი 9 საკითხს, თავმჯდომარისა და საკრებულოს სხვა თანამდებობის პირების გადაყენებას ითვალისწინებდა. მას კენჭისყრაზე რეგისტრირებული 34 დეპუტატიდან მხოლოდ "ქართული ოცნების" 20-ვე წევრმა მისცა ხმა. გადაწყვეტილების მისაღებად კი, 45 მანდატიან საკრებულოში, სულ ცოტა, 23 ხმაა საჭირო.

"31 მაისის შემდეგ, სამი თვეა, ყოველდღიურ რეჟიმში ველოდებოდით, რომ პასუხისმგებლობას იგრძნობდნენ ის დეპუტატები და პარტიები, "ქართული ოცნება" და "ერთიანი ნაციონალური მოძრაობა", რომლებიც არ ესწრებოდნენ და ბოიკოტს უცხადებდნენ როგორც ჩვენს საკრებულოს, ასევე მოქალაქეებს, მოვიდოდნენ სხდომაზე. დღეს კვორუმი შედგა და ამასთან, გაფორმდა ოცნების მარცხი. ის საკითხები, რაც მათ ოცნებასთან ერთად, ჰქონდათ დაინიციირებული, რომელიც ეხებოდა საკრებულოს თავმჯდომარისა და სხვა თანამდებობის პირების შესახებ გადაყენებას, ხმათა უმრავლესობით ყველა საკითხი ჩავარდა. შესაბამისად, ასევე 26 ოქტომბერს, არჩევნების დღესაც გაფორმდება მათი ფარული გარიგებების მარცხი", - ეუბნება რადიო "ათინათს" საკრებულოს თავმჯდომარე და პარტია "საქართველოსთვის" წარმომადგენელი გიგა ფარულავა.

მისივე თქმით, დღეიდან წარმომადგენლობითი ორგანო აქტიურ რეჟიმში იმუშავებს და პარტიების ბოიკოტირებისას დაგროვილი მნიშვნელოვანი საკითხების კომისიური განხილვები ეტაპობრივად ჩატარდება.

შეგახსენებთ, ზუგდიდის საკრებულოში თავმჯდომარისა და კომისიების წევრთა იმპიჩმენტის შესახებ წინადადება "ქართულმა ოცნებამ" და "ხალხის ძალამ" 10 აპრილს დაარეგისტრირეს. 31 მაისიდან წარმომადგენლობითი ორგანოს მუშაობა შეფერხებული იყო. ამ დღეს "ერთიანი ნაციონალური მოძრაობის" წევრები შენობაში არ გამოცხადდნენ, "ქართული ოცნების" დეპუტატებმა კი, სხდომათა დარბაზში ყოფნის მიუხედავად, რეგისტრაცია არ გაიარეს.


ამავე თემაზე: 

კვორუმის არარსებობის გამო ზუგდიდის საკრებულოში სხდომა მეორმოცედ ჩაიშალა

ზუგდიდის საკრებულოში თავმჯდომარისა და კომისიის ხელმძღვანელების გადაყენება 21-ედ გადაიდო

ზუგდიდის საკრებულოში კვორუმი კვლავ ვერ შედგა, სხდომა 30-ედ ჩაიშალა

ოპოზიციონერი საკრებულოს თავმჯდომარის გადაყენების საკითხი ზუგდიდში კვლავ გადაიდო

მომავალ კვირაში ზუგდიდის საკრებულო ოპოზიციონერი თავმჯდომარის, მოადგილეებისა და თანამდებობის პირების გადაყენებას განიხილავს

პოლიტიკური კონსულტაციების გამო არ ვესწრებოდით - "ქართული ოცნება" საკრებულოში მივიდა

ოპოზიციონერი თავმჯდომარისა და კომისიების ხელმძღვანელების გადაყენება, შეუმდგარი კვორუმი და ბრალდებები - რა ხდება ზუგდიდის საკრებულოში