ცოტა ხნის წინ, სოციალური ქსელების აფხაზურ სეგმენტში ვეტერანი ქართველი ფეხბურთელის გელა ინალიშვილის სოხუმში სტუმრობას განიხილავდნენ.
სოხუმის ე.წ. „დინამოს“ პრეზიდენტმა, (ოფიციალური კლუბი „დინამო სოხუმი“ ამჟამად საქართველოს რეგიონულ ლიგაში თამაშობს) ასტამურ ადლეიბამ წარუდგინა კლუბის მოთამაშეებს და თქვა, რომ ინალიშვილი კლუბში 1984-1989 წლებში თამაშობდა.

„როდესაც სოხუმის „დინამო“ გამოდიოდა პირველ ლიგაში, ის იყო ამ შემადგენლობაში, იღებდა ყველაზე აქტიურ მონაწილეობას... იყო ძირითადი შემადგენლობის ფეხბურთელი“, - აღნიშნა ადლეიბამ.

„დინამოსა“ და „ათონს“ შორის ამხანაგური მატჩის წინ ჩვენ მივესალმეთ სტუმარს, ყოფილ მოთამაშეს, სოხუმის „დინამოს“ ვეტერანს, გელა ინალიშვილს. ჩვენ ერთმანეთს გადავეცით საჩუქრები - გელა ინალიშვილმა კლუბს აჩუქა ბურთები, ჩვენ კი მას ვუსახსოვრეთ სოხუმის „დინამოს“ შარფი“, - წერია საფეხბურთო კლუბის ფეისბუკ გვერდზე.

სოხუმში ფეხბურთელებთან ინალიშვილის შეხვედრას აფხაზური ტელეგრამ-არხები ერთი თვის დაგვიანებით გამოეხმაურნენ.

„აფხაზური პორტალი“ წერდა, რომ რომ გელა ინალიშვილი საქართველოს მოქალაქეა, ხოლო ასტამურ ადლეიბა შვილი იმ ბორის ადლეიბასი, რომელიც 1978-1989 წლებში საქართველოს სსრ კომუნისტური პარტიის აფხაზეთის საოლქო კომიტეტის პირველი მდივნის თანამდებობას იკავებდა და ხელი მოაწერა ლიხნის მიმართვას.

„ასეთი „თბილი“ შეხვედრის ორგანიზატორებს დაავიწყდათ, რომ გელა ინალიშვილი არა მხოლოდ საბჭოთა „დინამოს“ ფეხბურთელია, არამედ ის საქართველოს ქალთა ახალგაზრდული ნაკრების ყოფილი მწვრთნელია და მანამდე საქართველოს ეროვნული ნაკრების რიგებში გამოდიოდა , ხოლო 1989 წელს, როდესაც ქართველებმა დაიწყეს აფხაზური სტრუქტურების ნაციონალური ნიშნით გაყოფა, „ქვეყანაში“ არსებითად ორხელისუფლებიანობის დამყარება, გაიყო სოხუმის „დინამო“, საიდანაც ქართველები წავიდნენ. მაშინ გელა ინალიშვილი „დინამოდან“ ქართულ გუნდში, „ცხუმში“, წავიდა. მაგრამ ამის შესახებ შეხვედრაზე ერთი სიტყვაც არ თქმულა“, - წერს ტელეგრამის არხი.

ოკუპირებულ აფხაზეთში მიაჩნიათ, რომ ინალიშვილს შესვლის ნებართვა დე ფაქტო სახელმწიფო უსაფრთხოების სამსახურმა მისცა.

აქვე მითითებულია, რომ გელა ინალიშვილს წარსულში ნათესაური კავშირი ჰქონდა აფხაზეთის უმაღლესი საბჭოს ყოფილ დეპუტატთან (1991წ.) ვახტანგ ყოლბაიასთან , რომელმაც, თავის მხრივს, ცოტა ხნის წინ მონაწილეობა მიიღო სერგეი შამბასთან ერთობლივ გადაცემაში.

„ზოგადად, თამაში მიდის, მაგრამ ჯერ არ არის ცნობილი, სპორტულია თუ პოლიტიკური“, - აღნიშნავს ერთ- ერთ ტელეგრამ არხი ავრცელებს.

„აქ სხვა რამ არის მნიშვნელოვანი - რატომ იყო აუცილებელი ინალიშვილის აფხაზეთში ჩამოსვლა და ის, რა მიზნით გააცნეს ჩვენს ახალგაზრდებს? ნაკლებად სავარაუდოა, რომ გელა ინალიშვილი მათ გაწვრთნის, ამასთან, ის არც მსოფლიო ფეხბურთის ვარსკვლავია. და კიდევ, მომავალში ჩვენს „ქვეყანაში“ საქართველოს რომელ მოქალაქეს ჩამოიყვანენ?! ბიზნესმენები უკვე იმყოფებოდნენ; პრეზიდენტის მრჩეველმა ქართველი პოლიტიკოსები ხატთან ერთად ჩამოიყვანა; იმყოფებოდა მომღერალი, ახლა კი - ფეხბურთელი.

სხვა ტელეგრამ არხის ავტორი წერს, რომ აფხაზმა ლიდერმა ასლან ბჟანიამ თანამოაზრეების ხელით დაიწყო ქართული პროგრამის „ჩართულობა აღიარების გარეშე“ და „მრავალდონიანი მოლაპარაკებების“ შესახებ თავისი კონცეფციის რეალიზაცია.