კოალიცია "ერთიანობა - ნაციონალური მოძრაობის" წარმომადგენლის ანა წითლიძის ინფორმაციით, გუშინ ღამით, დარჩელში, პარტიის ოფისში ქართული ოცნების აქტივისტებს პროვოკაციის მცდელობა ჰქონდათ. მისი თქმით, ისინი შტაბში მუქარითა და შეურაცხყოფით შევიდნენ.

"ქართული ოცნების" მხარდამჭერები შტაბში შემოგვივარდნენ შეურაცხყოფებით. ერთ-ერთი იყო მამუკა ქორთუშვილი, "ოცნების" აქტივისტი. პროვოკაციას ხელმძღვანელობდა ოთარ კოდუა, დათო კოდუას მამა, რომელმაც ჩემი შტაბის წევრს უთხრა: "დაგკუწავ და ენას ამოგაძრობო"

ჩვენი შტაბის არც ერთი წევრი, არც ერთი აქტივისტი არ მისულა ქართული ოცნების მიერ ორგანიზებულ ღონისძიებაზე პროვოკაციის მოსაწყობად. ქართული ოცნების არც ერთ შტაბს ჩვენი აქტივისტები არათუ არ გაკარებიან, ბუკლეტების დარიგებისას ვაფრთხილებ, ახლომახლო არც დაარიგონ რომ ნებისმიერი პროვოკაცია თავიდან ავირიდო", - წერს იგი.

აღნიშნულ საკითხზე კომენტარისთვის რადიო "ათინათმა" დავით კოდუას პრესსამსახურს მიმართა და მათგან პასუხს ველოდებით.

შეგახსენებთ, ზუგდიდის მუნიციპალიტეტის სოფელ დარჩელში "ერთიანობა - ნაციონალური მოძრაობის" წევრები ადგილობრივ მოსახლეობას პირველ სექტემბერს შეხვდნენ და წინასაარჩევნოდ რეგიონული ოფისი გახსნეს. მანამდე, 15 აგვისტოს, საქართველოს პრემიერ-მინისტრმა ირაკლი კობახიძემ ზუგდიდში "ქართული ოცნების" დელეგატად გუბერნატორის ყოფილი მოადგილე დავით კოდუა წარადგინა. მისი თქმით, ის რეგიონში პარტიის სარჩევნო კამპანიას გაუძღვება.