დღეს, 27 სექტემბერს სოხუმის დაცემიდან 31 წელი გავიდა. 1993 წლის 27 სექტემბერს რუსეთის სამხედრო შენაერთების, ჩრდილოეთ კავკასიის კონფედერატებისა და დაქირავებული "ბოევიკების" დახმარებით, აფხაზეთის სეპარატისტულმა ძალებმა აიღეს სოხუმი. რამდენიმე დღეში კი მათ აფხაზეთის თითქმის მთელი ტერიტორია დაიკავეს.

ადგილობრივმა მთავრობის წევრებმა, მათ შორის ჟიული შარტავამ და გურამ გაბესკირიამ უარი თქვეს ქალაქის დატოვებაზე, რის შემდეგაც ისინი მთავრობის სახლის წინ დახვრიტეს, ხოლო არსებული ცნობით, ალექსანდრე ბერულავა უგზო-უკვლოდ დაიკარგა.

ინფორმაციისთვის, აფხაზეთში შეიარაღებული კონფლიქტის პირველი ეტაპი 1992 წლის 14 აგვისტოს დაიწყო. საბოლოოდ, ომი 13 თვე და 13 დღე გაგრძელდა. გადამწყვეტი ბრძოლა სოხუმთან მოხდა, როდესაც ალყაშემორტყმული ქალაქი ინტენსიურად იბომბებოდა რუსული არტილერიითა და ავიაციით.

ომს 10 000-მდე ქართველის სიცოცხლე შეეწირა, 300 ათასამდე ადამიანი კი დევნილად იქცა.