დარჩელის საბავშვო ბაღის ყოფილი დირექტორი ირინა კაკაჩია სოციალურ ქსელში წერს, რომ ის პოზიციიდან პოლიტიკური ნიშნით გაათავისუფლეს.

მისი თქმით, სოფლის საბავშვო ბაღის უფროსის მოვალეობას ის წელიწად ნახევარი ასრულებდა, პირველი ეჭვი კი მაშინ გაჩნდა, როდესაც დარჩელის პირველი საჯარო სკოლის მოსწავლეებმა, სკოლის დამთავრების ღონისძიებაზე, პერფორმანსი დადგეს, რაც მიზნად ქვეყნის ევროპისკენ სწრაფვას ისახავდა.

"აღნიშნულმა ჩანაწერმა მოიარა სოციალური ქსელები და აღფრთოვანებული იყო ყველა. მოსწავლეებმა ეს დამოუკიდებლად გააკეთეს, როგორც პედაგოგის პირდაპირი წილი, ჩემი არანაირი არ ყოფილა, მაგრამ გამიხარდა თუ არა?!

დიახ, გამიხარდა და ეს სიხარული არ დამიმალავს, რადგანაც ვთვლი, რომ ახალგაზრდები იყვნენ მართლები და ამაყი თაობა იდგა რუსთაველზე, ხელისუფლებამ კი ნამდვილად მიიღო, ანტიქართული კანონი", - წერს ის.

მისივე მტკიცებით, სამსახურიდან გათავისუფლების გადაწყვეტილება დარჩელში "ქართული ოცნების" შტაბის მაღალჩინოსანმა მიიღო.

"კონკრეტულად, ზემოთნახსენები ჩინოვნიკის მიუღებლობა ჩემს მიმართ, გახდა ჩემი განთავისუფლების მიზეზი. რაც დამეთანხმებით, წმინდა წყლის პოლიტიკური ნიშნით ადამიანის დისკრიმინაციას ნიშნავს", - დასძენს ის.

ამასთან, კაკაჩია თავის ფეისბუქ გვერდზე აზიარებს იმ ვიდეო ჩანაწერს, რომელშიც დარჩელის პირველი სკოლის მოსწავლეებს პროევროპული შინაარსის პლაკატები უჭირავთ.