მესტიის მუნიციპალიტეტის ფარის მე-2 საჯარო სკოლის ქართული ენისა და ლიტერატურის მენტორ-მასწავლებელი ეკატერინე წულუკიძე სოციალურ ქსელში პოლიტიკური ნიშნით დისკრიმინაციაზე საუბრობს. ის წერს, რომ მასწავლებლის ეროვნული დღისადმი მიძღვნილ ღონისძიებაზე, დამსახურებული პედაგოგების სიიდან მისი კანდიდატურა მოხსნეს.

"სკოლის პედ.კოლექტივმა და დირექტორმა ჩვენი სკოლიდან წარმადგინა მე,რისთვისაც უზარმაზარ მადლობას ვუხდი მათ, ვინ თუ არა მათ იციან რას ვაკეთებ მე ჩემო მოსწავლეებისთვის, სკოლისთვის, თემისთვის და ზოგადად რაიონის ახალგაზრდებისთვის.

დადგა დაჯილდოების მომენტი და დარბაზში ვიგებთ,რომ მე ამოღებული ვარ სიიდან და ჩანაცვლებული.მარტო მე არ ვყოფილვარ ამ სიტუაციაში,სხვები თავად იტყვიან,ალბათ…ძალიან უხერხულ სიტუაციაში აღმოჩნდნენ დირექტორები,როცა მათ მიერ წარდგენილი კანდიდატების ნაცვლად თავად იყვნენ ჩანაცვლებული.

თითოეული მასწავლებლის საქმე გაგზავნილი იყო განათლების სამინისტროში და ერთ-ერთმა დეპარტამენტმა განიხილა და შეარჩია სასურველი კანდიდატები.თითქოს უჩვეულო არაფერი,მაგრამ კითხვები მაინც თავს იყრის…

1) რატომ იყო რაიონულ კონფერენციაში ესოდენ ჩართული განათლების სამინისტროს "ერთ-ერთი" დეპარტამენტი სკოლების მიერ წარდგენილ კანდიდატების გაცხრილვაში?

2) თუ დამსახურებას ეხებოდა საქმე,რატომ აღმოვჩნდი ასეთ დამცირებულ პოზიციაში? ნუთუ იმიტომ, რომ ჩემი პოლიტიკური გემოვნება არ ემთხვევა მათსას?

ბოლომდე არ მინდა დავიჯერო,რომ ეს ხდება აქ მესტიაში,სადაც მთელმა რაიონმა იცის ჩემი დამსახურების შესახებ,მაგრამ, რა დამპალი ყოფილა პოლიტიკა…

ეს იყო ყველაზე უღირსი საქციელი, რითაც შეეძლო მმართველ პარტიას წარმოეჩინა დემონსტრაციულად თავისი "უპირატესობა" და დაესაჯა "საეჭვო" მასწავლებლები", - აღნიშნავს ის.

ამასთან, ის მიმართავს განათლების სამინისტროს და ამბობს, რომ ელოდება პასუხს, რომელ დეპარტამენტში განიხილეს მასწავლებლების პირადი საქმეები და რატომ გახდა მიუღებელი მისი კანდიდატურა სკოლის ღონისძიებაზე.