მოსკოვში აცხადებენ, რომ მხარს უჭერენ „აფხაზეთში სიტუაციის სწრაფად ნორმალიზებას“, ამის შესახებ რუსეთის პრეზიდენტის პრესმდივანმა დიმიტრი პესკოვმა განაცხადა. ეს მოსკოვის პირველი ოფიციალური კომენტარია, სოხუმში 15 ნოემბერს დაწყებული საპროტესტო აქციების დაწყებიდან.

„გვსურს, რომ ეს სიტუაცია დარჩეს აბსოლუტურად კონსტიტუციურ ჩარჩოებში”, - უთხრა მან ჟურნალისტებს და დასძინა, რომ „მოსკოვსა და სოხუმს შორის ურთიერთობები „რუსეთის საგარეო პოლიტიკის ძალიან მნიშვნელოვანი პრიორიტეტია“.

უფრო ადრე, რუსეთის საგარეო საქმეთა სამინისტროს წარმომადგენელმა მარია ზახაროვამ გააკრიტიკა აფხაზეთის ოპოზიციური ძალები, რომლებმაც, მისი თქმით, „შეუძლებლად მიიჩნიეს ქვეყნის ლეგიტიმურ ხელისუფლებასთან უთანხმოების მოგვარება ცივილიზებული, ურთიერთპატივისცემის მქონე დიალოგის გზით და გასცდნენ სამართლებრივ ჩარჩოებს, რამაც გამოიწვია კონფლიქტის ესკალაცია.”

რუსეთის საგარეო უწყების განცხადებაში აღნიშნული იყო, რომ რუსული მხარე, „აფხაზეთის შიდა პროცესებში ჩარევის გარეშე მოელის, რომ შექმნილი ვითარება მოგვარდება მხოლოდ მშვიდობიანი, პოლიტიკური საშუალებებით“.

იმავე დღეს, რუსეთის ფედერაციის ეკონომიკური განვითარების სამინისტრომ მოუწოდა რუს ტურისტებს, თავი შეიკავონ აფხაზეთში მოგზაურობისგან, ხოლო იქ მყოფი რუსები, თუ ეს შესაძლებელია, რუსეთში დაბრუნდნენ.

იმავე დღეს, რუსეთის ფედერაციის ეკონომიკური განვითარების სამინისტრომ, საგარეო საქმეთა სამინისტროს შემდეგ, რეკომენდაცია მისცა რუს ტურისტებს თავი შეიკავონ აფხაზეთში მოგზაურობისგან, ხოლო იქ მყოფებს ურჩია,  რუსეთში დაბრუნდნენ.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი.

თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.