ზუგდიდის შოთა მესხიას სახელმწიფო უნივერსიტეტის სტუდენტები არჩევნების შედეგების გასაპროტესტებლად ღამეს უნივერსიტეტის შენობაში გაათენებს. მათ მიერ გავრცელებულ განცხადებაში აღნიშნულია, რომ დღეს უმაღლესი სასწავლებელი უნდა იყოს ადგილი, სადაც არამხოლოდ ცოდნის, არამედ სამოქალაქო პასუხისმგებლობის გაზიარებაც ხდება.

"ზუგდიდის შოთა მესხიას სახელმწიფო უნივერსიტეტის სტუდენტების ნაწილი ვეხმაურებით ქვეყანაში მიმდინარე მოვლენებს და გვსურს, საჯაროდ და მკაფიოდ დავაფიქსიროთ ჩვენი პოზიცია. ვუერთდებით სხვა უნივერსიტეტის სტუდენტების ბრძოლას მოპარული ხმებისთვის, ტოტალურად გაყალბებული არჩევნების წინააღმდეგ და სრულიად ვიზიარებთ საერთო სულისკვეთებას. მხარს ვუჭერთ იმ სტუდენტებს, რომლებიც არ ერიდებიან გამოხატონ პოზიცია და აცნობიერებენ, რომ მათი ხმა უნდა ისმოდეს არამხოლოდ უნივერსიტეტში, არამედ მთელი ქვეყნის მასშტაბი. ქართველ სტუდენტებს აქვთ პასუხისმგებლობა, იცხოვრონ უკეთეს მომავალში, სადაც მათი არჩევანი იქნება გადამწყვეტი, ხოლო მათი უფლებები კი დაცული. ჩვენ მზად ვართ, გავაგრძელოთ მონაწილეობა საზოგადოებრივ აქტივობებში, რათა დავიცვათ ის პრინციპები, რომლებიც ნამდვილად გამოხატავს ჩვენი საზოგადოების ნებასა და ჩვენი ქვეყნის კონსტიტუციას. უნივერსიტეტი ყოველთვის იყო უმნიშვნელოვანესი ბირთვი, სადაც შეიკრიბა საქართველოს გამჭრიახი, კრიტიკული აზროვნების ნაყოფიერი გონება. დღეს კი, უნივერსიტეტი უნდა იყოს ადგილი, სადაც არამხოლოდ ცოდნის, არამედ სამოქალაქო პასუხისმგებლობის ჩანერგვა ხდება. ვაგრძელებთ ბრძოლას რუსული რეჟიმის წინააღმდეგ. მივმართავთ სხვა სტუდენტებს, შემოგვიერთდით, რადგან თქვენი აქ ყოფნა ისე მნიშვნელოვანია, როგორც არასდროს. გელოდებით უნივერსიტეტის შენობაში მთელი ღამის განმავლობაში", - აცხადებენ სტუდენტები.

ცნობისთვის, რამდენიმე დღის წინ, ამავე უნივერსიტეტის სტუდენტების ნაწილმა გაავრცელა განცხადება, რომელშიც აღნიშნულია, რომ ისინი არ აღიარებენ არჩევნების ლეგიტიმურობას და სოლიდარობას უცხადებენ საქართველოს სხვადასხვა უნივერსიტეტის სტუდენტებს, რომლებიც 26 ოქტომბრის არჩევნების გაყალბებას აპროტესტებენ.