აფხაზი ოპოზიციონერები მოითხოვენ, რომ დე ფაქტო რესპუბლიკის ე.წ. პარლამენტმა განსახილველად გაიტანოს და „წერტილი დასვას“ რუსეთთან საინვესტიციო შეთანხმების საკითხში.

„ჩვენ წერტილი უნდა დავუსვატ საინვესტიციო შეთანხმების საკითხს. ეს შეთანხმება არ შეესაბამება აფხაზი ხალხის, აფხაზური ბიზნეს საზოგადოების ინტერესებს. ეს შეთანხმება ერთხელ და სამუდამოდ უნდა გაუქმდეს“, - განაცხადა „აფხაზთა სახალხო მოძრაობის“ ლიდერმა ადგურ არძინბამ ოპოზიციის საკოორდინაციო საბჭოს სხდომაზე.

მისი თქმით, „დეპუტატები“ მომავალ სხდომაზევე უნდა დაუბრუნდნენ „საინვესტიციო შეთანხმების“ თემას. 

„ჩვენ უკვე უნდა ვისწავლოთ, ცალსახად და მტკიცედ ვთქვათ „არა“ ყველა ანტიეროვნულ ინიციატივაზე. ეს სწორი სიგნალია მათთვის, ვისაც მომავალში სურს მსგავსი ინიციატივის გამტარებელი იყოს“, - დასძინა მან.

ვეტერანთა ორგანიზაცია „არუაას“ ლიდერი თემურ გულია ამბობს, რომ შეთანხმებას კინაღამ „სამოქალაქო ომი მოჰყვა". 

„დიდება ღმერთს, სისხლი არ დაიღვარა. კიდევ ერთხელ აჩვენა აფხაზმა ხალხმა, რომ შეუძლია სახელმწიფოს შენების იდეის ირგვლივ გაერთიანება“, - აღნიშნა მან.

ე.წ. პარლამენტს "რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ“ შეთანხმების რატიფიცირების საკითხი 15 ნოემბერს უნდა განეხილა, თუმცა პროტესტის დაწყების გამო, სხდომა ჩაიშალა.

ოპოზიციის მხარდამჭერებმა სოხუმში „სამთავრობო შენობები“ და „პრეზიდენტის“ ადმინისტრაცია დაიკავეს და ასლან ბჟანიას გადადგომა მოითხოვეს.

ე.წ. ხელისუფლებასა და ოპოზიციას შორის მოლაპარაკებების გამართვის შემდეგ, 19 ნოემბერს, ასლან ბჟანია „თანამდებობიდან“ გადადგა, სანაცვლოდ კი, დემონსტრანტებმა „სამთავრობო“ შენობები დატოვეს.

„პრეზიდენტის“ მოვალეობას „ვიცე-დროებით „ვიცე - პრეზიდენტი“ ბადრა გუნბა ასრულებს, ხოლო ალექსანდრე ანქვაბის ნაცვლად „პრემიერის“ პოსტი დროებით ვალერი ბგანბამ დაიკავა.

გავრცელებული ინფორმაციით, ოკუპირებულ აფხაზეთში ვადამდელი „საპრეზიდენტო“ არჩევნები, შესაძლოა, 2025 წლის 15 ან 16 თებერვალს ჩატარდეს.