ოკუპირებული აფხაზეთის „საგანგებო სიტუაციების სამინისტროს“ თანამშრომლებმა დე ფაქტო რესპუბლიკაში ბიჭვინთის მცხოვრების, ოლეგ მიხალიოვის ცხედარი გადაასვენეს.  
ამავე ინფორმაციით, 29 წლის მამაკაცი, „კურსკის რაიონში უკრაინის სამხედრო ფორმირებებთან ბრძოლაში დაიღუპა“.

მანამდე, ცნობილი გახდა, რომ სოხუმში სეპარატისტული დონბასიდან გადაასვენეს, რუსეთის მხარეს მებრძოლი აფხაზი მოხალისის, გუდაუთის რაიონის სოფელ ჯირხვას მცხოვრების, გოგი აჟიბას ცხედარი, რომელიც 27 ნოემბერს კრასნოარმეისკის რაიონში დაიღუპა.

ტელეგრამის არხები სექტემბერში იტყობინებოდნენ, კურსკის ოლქის სუჯანსკის რაიონის სოფელ კირეევკასთან, საბრძოლო მოქმედებების ზონაში, აფხაზეთის მცხოვრების იგორ ხეციას დაღუპვის შესახებ.  ის ბატალიონ „პიატნაშკაში“ ირიცხებოდა. 

აგვისტოს დასაწყისში, „დონბასის ველური დივიზიის“ მეთაურმა ახრა ავიძბამ დაწერა, რომ უკრაინაში რუსეთის მხარეს მებრძოლი აფხაზი მოხალისეები „დონბასის ველური ბატალიონიდან“ კურსკის ოლქში გადაისროლეს.

2023 წლის ნოემბერში მან განაცხადა , რომ „პიატნაშკა“, რომელიც თავად ჩამოაყალიბა, გაფართოვდა და შეიქმნა „დონბასის ველური დივიზია“.

უკრაინაში რუსეთის მხარეს მებრძოლი აფხაზი მოხალისეები, ძირითადად, „პიატნაშკას“ ბატალიონში ირიცხებოდნენ.

ცნობისთვის, ცოტა ხნის წინ, ოკუპირებული აფხაზეთის საგარეო საქმეთა მინისტრმა სერგეი შამბამ განაცხადა, რომ მოსკოვი რუსეთში მცხოვრები აფხაზი სტუდენტების რუსეთის ფედერაციის სამხედრო გაწვევის კომისარიატებში რეგისტრაციას ითხოვს. მისი თქმით, საუბარია „ორმაგი, აფხაზეთის და რუსეთის მოქალაქეობის“ მქონე სტუდენტებზე. მისივე თქმით, ამ საკითხის გადაწყვეტა ჭიანურდება, რადგან საჭიროა რუსეთის ფედერაციის პრეზიდენტის დამატებითი განკარგულება. გავრცელებული ინფორმაციით, სერგეი შამბას შვილიშვილსაც მოსთხოვეს სამხედრო კომისარიატში რეგისტრაცია.

რუსეთი უკრაინის წინააღმდეგ ომს 2022 წლის 24 თებერვლიდან აწარმოებს. იმავე წლის 21 თებერვალს, რუსეთის პრეზიდენტმა ვლადიმირ პუტინმა ცნო ე. წ. დონეცკისა და ლუგანსკის სახალხო რესპუბლიკების "დამოუკიდებლობა და სუვერენიტეტი".

ცნობისთვის, 2022 წლის მარტში ოკუპირებული აფხაზეთის "დამოუკიდებლობა" ე.წ. ლუგანსკის სახალხო რესპუბლიკამ აღიარა.

მანამდე აფხაზეთის დე ფაქტო რესპუბლიკის საგარეო საქმეთა სამინისტრომ გაავრცელა პრესრელიზი, რომელშიც ნათქვამია, რომ სოხუმმა და ე.წ დონეცკის სახალხო რესპუბლიკამ "დიპლომატიური ურთიერთობები დაამყარეს და ნოტები გაცვალეს".

26 თებერვალს, აფხაზმა ლიდერმა ასლან ბჟანიამ ხელი მოაწერა ბრძანებას დონბასის სეპარატისტული ე.წ.დონეცკისა და ლუგანსკის რესპუბლიკების აღიარების შესახებ.

საქართველოს ორი რეგიონის აფხაზეთისა და "სამხრეთ ოსეთის " დამოუკიდებლობა სირიამ 2018 წელს, მანამდე, 2008 წლის აგვისტოს ომის შემდეგ რუსეთმა, იმავე წლის სექტემბერში კი ნიკარაგუამ აღიარეს. 2009 წელს აფხაზეთის და ცხინვალის რეგიონი ე.წ. დამოუკიდებელ რესპუბლიკებად ვენესუელამ და ნაურუმ ცნეს.