აფხაზეთის თვითგამოცხადებული რესპუბლიკის „პრეზიდენტის“ მოვალეობის შემსრულებელი ბადრა გუნბა საპრეზიდენტო არჩევნებში საინიციატივო ჯგუფის წინადადებით იყრის კენჭს. ამის შესახებ დე ფაქტო ცესკომ TASS-ს განუცხადა.

„ცენტრალურ კომიტეტში მივედით გუნბას საპრეზიდენტო კანდიდატად წარდგენის მოთხოვნით“, - განაცხადა საინიციატივო ჯგუფის ერთ-ერთმა წევრმა.

მანადემ ცნობილი გახდა, რომ გადამდგარი „პრეზიდენტი“, ასლან ბჟანია 2025 წლის თებერვალში დაგეგმილ „საპრეზიდენტო“ არჩევნებში საკუთარ კანდიდატურას არ წარადგენს, თუმცა მისი გუნდი მონაწილეობას მიიღებს.

რამდენიმე დღის წინ დე ფაქტო ცესკომ რუსულ მედიას განუცხადა, რომ „პრეზიდენტობისთვის“ ხუთი ან ექვსი კანდიდატი იბრძოლებს, მათ შორის : „პრეზიდენტის“ მოვალეობის შემსრულებელი, ბადრა გუნბა, ოპოზიციის ერთ-ერთი ლიდერი - ადგურ არძინბა, რუსეთის ფედერაციაში „აფხაზეთის სავაჭრო პალატის“ წარმომადგენელი ოლეგ ბარციცი, ასევე „კონტროლის პალატის“ ყოფილი ხელმძღვანელი - რობერტ არშბა.

აქვე აღნიშნულია, რომ ჩამონათვალს, შესაძლოა კიდევ ერთი ან ორი კანდიდატის დაემატოს.

აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან 19 ნოემბერს გადადგა. პოსტი დატოვა “პრემიერ-მინისტრმა” ალექსანდრე ანქვაბმაც.

15 ნოემბერს აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.

მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის დაფინანსება.

შეგახსენებთ, რომ ოკუპირებულ აფხაზეთში ე.წ. საპრეზიდენტო არჩევნები 2025 წლის 15 თებერვალს გაიმართება.