დღეს, 25 დეკემბერს, ზუგდიდში, 17:00 საათზე,  ქალთა მარში გაიმართება.

აქციის ორგანიზატორების თქმით, მარში დაიწყება ბულვარის ბოლოში, რაფიელ ერისთავის ბიუსტთან და დასრულდება სამხარეო ადმინისტრაციის შენობასთან.

როგორც სოლიდარობის ფონდის მიერ გავრცელებულ ინფორმაციაშია აღნიშნული, 16:00 საათიდან მომიტინგეები შეიკრიბებიან ზუგდიდის მერიასთან და იქ მომუშავე საჯარო მოხელეებს კიდევ ერთხელ შეახსენებენ, რომ დუმილის დრო არ არის, რადგან დუმილი უკვე პოზიციაა და მოძალადე რეჟიმის მხარეს დგომას ნიშნავს.

,,ქალები კიდევ ერთხელ ავიმაღლებთ ხმას რუსული რეჟიმის წინააღმდეგ! მსვლელობით შევუერთდებით ჩვენს თანამებრძოლებს, რომლებთნ ერთადაც უკვე 28-ე დღეა ვიბრძვით საქართველოს ევროპული მომავლისთვის’’, - აღნიშნულია სამოქალაქო სოლიდარობის ფეისბუქ გვერდზე.

შეგახსენებთ, 28 ნოემბრიდან, თბილისსა და საქართველოს სხვა ქალაქებში, მათ შორის, ზუგდიდში, პერმანენტული საპროტესტო აქციები იმართება. მოქალაქეები აპროტესტებენ „ქართული ოცნების“ გადაწყვეტილებას, საქართველოს ევროკავშირთან მოლაპარაკებების შეჩერების შესახებ.