დღეს, 26 დეკემბერს, ზუგდიდში საკრებულოს რიგგარეშე სხდომა გაიმართა, რომელზეც მუნიციპალიტეტის 2025 წლის ბიუჯეტი დაამტკიცეს. მისი მოცულობა 70 მილიონ 500 ათასი ლარით განისაზღვრა და მას მხარი "ქართული ოცნების", "ახალის" და "საქართველოსთვის" წევრებმა დაუჭირეს.

სხდომას არ ესწრებოდნენ "ნაციონალური მოძრაობის" დეპუტატები, რომლებმაც წარმომადგენლობითი ორგანოს მიერ ბიუჯეტის დამტკიცების საკითხზე ბრიფინგი გამართეს და აღნიშნეს, რომ მიღებული გადაწყვეტილება არ ასახავს ზუგდიდელების ინტერესს.

"დღეს ამ ფონზე, როდესაც საქართველოში მთავრობა დაკავებული არის ადამიანების ცემა - ტყეპით, მთავრობა , რომელიც არჩევნებში იყო დაკავებული მოსყიდვებით, შანტაჟით, ამ ყველაფრის ფონზე საკრებულოში პარტია ,,ახლებმა"" და ,,გახარიას საქართველოსთვის"" მიიღეს გადაწყვეტილება ერთობლივად მიეღოთ 2025 წლის ბიუჯეტი, ბიუჯეტი რომელიც არ ასახავს ზუგდიდელების ინტერესს, ბიუჯეტი რომელიც არის მხოლოდ და მხოლოდ ხელფასები. ზუგდიდის ბიუჯეტი წარმოდგენილი არის მხოლოდ და მხოლოდ 59 მილიონი, ამ 50 მილიონი ლარიდან 40 მილიონი ლარი არის სახელფასო, უბრალოდ ბიუჯეტი არ გვაქვს მეგობრებო, ეს არის სახელფასო ფონდი, ამ ყველაფრის მიუხედავად დღეს ქოცებს დაუმტკიცეს ბიუჯეტი", - თქვა "ენმ"-ის წევრმა დავით ფიფიამ.

ფრაქცია "საქართველოსთვის" წარმომადგენელი მალხაზ თორია პასუხობს "ნაციონალური მოძრაობის" განცხადებას და განმარტავს, რომ გაუგებარია ოპონენტების პოზიცია მაშინ, როდესაც "ენმ"-მ ჩხოროწყუს მუნიციპალიტეტში 2025 წლის ბიუჯეტის პროექტს მხარი სრულად დაუჭირა მხარი.

"სახელფასო მატება არის დადგენილი საქართველოს მთავრობის მიერ და 4 წლის განმავლობაში, ყოველწლიურად, საჯარო მოხელეებს და აიპ-ში და სსიპ-ში დასაქმებულებს ემატებათ ხელფასის ოდენობა 10%-ით. ჩემთვის გაუგებარია ენმ-ის განცხადება, რომ ჩვენ მივიღეთ ბიუჯეტი ზუგდიდის მუნიციპალიტეტის საკრებულოში და არ ფიქრობენ, არ აღნიშნავენ იმ გარემოებას, რომ დღესვე, ჩხოროწყუს მუნიციპალიტეტში ფრაქცია "ენმ"-მ სრული შემადგენლობით მხარი დაუჭირა ჩხოროწყუს მუნიციპალურ ბიუჯეტს. წინააღმდეგობაში მოდიან ერთმანეთთან. ისინი ვერ ახორციელებენ მიზანს, რომ დარჩნენ პირველ ოპოზიციურ პარტიად. როგორც ჩანს, მათ ერთიანი ხაზი არ გააჩნიათ. ჩემთვის გაურკვეველია რას ამბობენ და აკეთებენ", - ამბობს თორია.

მისივე თქმით, 2025 წლის ბიუჯეტი განსაზღვრულია სხვადასხვა მნიშვნელოვანი მიმართულებისთვის, მათ შორის სოციალური კუთხით და აუცილებელია, მუნიციპალიტეტმა შეუფერხებლად იფუნქციონიროს.

"მუნიციპალიტეტმა უნდა იფუნქციონიროს. მუნიციპალიტეტს თავისი ფინანსური საჭიროებები აქვს და ჩვენ მის საქმიანობას კოლაფსში ვერ მოვაქცევდით. აუცილებელია ფულადი რესურსები გადანაწილდეს სოციალური, ჯანდაცვის და სკოლამდელი აღზრდის მიმართულებით. ყველა მიმართულება საჭიროებდა შესაბამის დაფინანსებას", - ამბობს "საქართველოსთვის" წევრი.

რადიო "ათინათი" დაუკავშირდა ფრაქცია "ახალის" წარმომადგენლებს. მათგან კომენტარის მიღების შემთხვევაში, მასალა განახლდება.

შეგახსენებთ, დღეს, ზუგდიდის მუნიციპალიტეტის საკრებულოში რიგგარეშე სხდომა პროტესტისა და ხმაურის ფონზე მიმდინარეობდა. ადგილობრივ წარმომადგენლობით ორგანოში სიტყვიერი დაპირისპირება მოჰყვა ოპოზიციონერი დეპუტატების მიერ თბილისში აქციებზე დაშავებული ადამიანების ფოტოების მიტანას. ამასთან, დღევანდელ სხდომაზე დეპუტატებმა მხარი დაუჭირეს ზუგდიდის 2025 წლის ბიუჯეტის პროექტს, რომელიც 70 მილიონ 500 ათასი ლარით განისაზღვრა.