აფხაზური ტელეგრამის არხი „აიაშარა“ „ვარდნილჰესი II “- ის „რეიდერული მიტაცების“ შესახებ ავრცელებს ინფორმაციას.

მასში ვკითხულობთ, რომ ოკუპირებულ გალის რაიონში მდებარე უმოქმედო ელექტროსადგურზე ე.წ. პარლამენტის „დეპუტატმა“ რეზო ზანთარიამ დაიწყო სარეაბილიტაციო სამუშაოები და "სადგური მის კუთვნილებაშია". თუმცა, მათივე თქმით, დე ფაქტო მთავრობაში, არავის განუცხადებია მისი არც გასხვისების, არც იჯარით გაცემის თაობაზე.

"რის საფუძველზე მიისაკუთრა ზანთარიამ სახელმწიფო ობიექტი? არსებობს ამასთან დაკავშირებული რაიმე დოკუმენტაცია? თუ კი, ვინ აწერს მას ხელს? რაც მთავარია, რატომ გადაეცა ხალხის კუთვნილი ობიექტი კერძო პირს ხალხის ზურგს უკან?! ჟურნალისტებმა კორუფციული სქემა მოვნიშნეთ და ახლა ბურთი გენერალური პროკურატურის მოედანზეა", - ნათქვამია "აიაშარას" მიერ მომზადებულ მასალაში.

ცნობისთვის: "ვარდნილჰესები" ენგურჰესის კომპლექსის შემადგენლობაში შედიან. ამ ეტაპზე, სრულად მხოლოდ ერთი - "ვარდნილჰესი I "- ია აღდგენილი, რომელიც სრული დატვირთვით (220 მეგავატი) მუშაობს.

რაც შეეხება დანარჩენ სამს, 2021 წელს ენგურჰესის დირექტორი ლევან მებონია აცხადებდა, რომ ისინი ქართული მხარის ბალანსზე იყო და თბილისში მათი აღდგენის სურვილიც გამოთქვეს, თუმცა სოხუმი უარზე იყო და აცხადებდა, რომ ობიექტის კომპანია "სოხუმი ჰესისთვის" არის დაგეგმილი. თუმცა ამ შემთხვევაში, აფხაზური მხარე უსასყიდლოდ გამომუშავებული ელექტროენერგიის მხოლოდ 20%-ს მიიღებდა.

ტელეგრამის არხის „ეხო აბხაზიის“ ცნობით, აფხაზეთის დე ფაქტო რესპუბლიკის „მთავრობის“ მეთაურმა ვალერი ბგანბამ ე.წ. შინაგან საქმეთა სამინისტროს „ვარდნილჰესი II“ -ზე მუშაობის შეჩერება დაავალა. მისი თქმით, „რეზო ზანთარია მუშაობს იქ, თუმცა, ამის შესახებ არავინ დაუუწყებია, რადგან, ამ შემთხვევაში უნდა არსებობდეს „პარლამენტის“ გადაწყვეტილება.

აფხაზეთის დე ფაქტო რესპუბლიკის ე.წ. პარლამენტის ეკონომიკური პოლიტიკის, რეფორმებისა და საინფორმაციო ტექნოლოგიების კომიტეტის თავმჯდომარე რეზო ზანთარია „ვარდნილჰესი II - ის“ რეიდერული მიტაცების შესახებ სოციალურ ქსელებში გავრცელებულ ინფორმაციას გამოეხმაურა. მისი თქმით, გავრცელებული ცნობები შეიცავს ცრუ ინფორმაციას, როგორც ამ სადგურის „იურიდიული სტატუსის“, ასევე მის შესახებ.


„მე ვპასუხობ ყველას, ვისაც აწუხებს „ვარდნილჰესი - II“ - ის ბედი. დავიწყებ იქიდან, რომ როცა ეს ჰიდროელექტროსადგური დაინგრა, გაძარცვეს, ლითონი კი ჯართში ჩააბარეს, სხვადასხვა ქვეყანაში, ის არავის აინტერესებდა - არც ხელისუფლებას და არც სამოქალაქო საზოგადოებას. როდესაც აღმოჩნდნენ ადამიანები, რომლებსაც სურდათ და შეეძლოთ მუშაობა, მაშინვე გაჩნდნენ „სიმართლისთვის მებრძოლები“. ვისაც რეალურად სურს იცოდეს სიმართლე ვარდნილჰესი 2 - ის შესახებ, გირჩევთ, შეისწავლოთ როგორც ჩვენი ქვეყნის კანონები, ასევე ამ სადგურის შესახებ დოკუმენტაცია“,- წერს ის ბრადლებების პასუხად.

ენგურჰესის ადმინისტრაციას ზემოაღნიშნულ ინფორმაციასთან დაკავშირებით კომენტარი ჯერჯერობით არ გაუკეთებია.