საქართველოს მეხუთე პრეზიდენტი სალომე ზურაბიშვილი ორბელიანების სასახლეს ტოვებს. ამის შესახებ მან დღეს, 29 დეკემბერს გამართულ ბრიფინგზე განაცხადა.

დილიდან ორბელიანების პრეზიდენტის სასახლესთან შეკრებილ მოქალაქეებს მან განუცხადა თავისი გადაწყვეტილების შესახებ:

“მე აქედან გამოვალ და თქვენთან ერთად ვიქნები”, – თქვა პრეზიდენტმა.

მისი თქმით, ორბელიანების სასახლე იქამდე იყო პრეზიდენტის სიმბოლო, სანამ პრეზიდენტი იყო ლეგიტიმური.

“მე ჩემთან მიმაქვს ლეგიტიმურობა, დროშა, თქვენი ნდობა და ეს სასახლე უნდა დავუბრუნოთ ორბელიანებს, მათია. მე მინდა თქვენთან ერთად დავფიქრდეთ, რას ნიშნავს ლეგიტიმურობა და ეს წყარო ხართ თქვენ. იქ სადაც ხალხის ნდობა არაა, ლეგიტიმურობაც ვერ იქნება. მე გამოვალ თქვენთან და თქვენთან ვიქნები”, – აღნიშნა პრეზიდენტმა.

სალომე ზურაბიშვილის ბრიფინგი, მიხეილ ყაველაშვილის ინაუგურაციის პარალელურად მიმდინარეობდა.

“იქით არის სიცარიელე, აქ საზოგადოებაა. იქით ჩაკეტილები არიან და ჩვენ ვართ გარეთ, რადგან არაფრის გვეშინია, არც გისოსების... ჩვენ ვართ ღია, თავისუფალი ლაღი, მშვიდნი, ჩვენთან არის სიმართლე, ქვეყნის სიყვარული და რაც კიდევ უფრო მნიშვნელოვანი შეიძლება იყოს, ერთმანეთის სიყვარული და ამიტომაც ჩვენ გავიმარჯვებთ", – განაცხადა პრეზიდენტმა.  

სალომე ზურაბიშვილმა “ქართული ოცნების” მხარეს “რუსული ტრაგედია” უწოდა.

"დღემდე, ამ წუთამდე დრო იყო მიცემული იმისთვის, რომ აქ მოსულიყვნენ ან ოცნების წარმომადგენლები ან თავად ივანიშვილი, რათა ამ კრიზისიდან პოლიტიკური გამოსავალი მოგვეძებნა - ანუ შეთანხმება ახალ, თავისუფალ, ნამდვილ არჩევნებზე. ეს იყო ჩემი შეთავაზება, რადგან ყოველთვის არის გამოსავალი მაშინ, როცა ქვეყანა გიყვარს. როგორც ხედავთ, აქ არავინ მოსულა. ნაცვლად ამისა, პასუხი მუქარა, რეპრესიები, ძალადობა, ცინიზმი და საკუთარი ხალხის წინააღმდეგ ომი იყო. პასუხია ის პაროდია, რაც ამ წუთებში პარლამენტში ხდება. ამ სახელმწიფოს ეს არ ეკადრება“, - თქვა მან.

რაც შეეხება სამომავლო გეგმებს, პრეზიდენტი აპირებს იმუშაოს რამდენიმე მიმართულებით, მათ შორის ახალი არჩევნების ჩასატარებლად მოსამზადებელ პირობებზე.

„არჩევნები ჩატარდება - სხვა გზა არ არის და ეს არის ყველა შემთხვევაში, ყველა ასეთი კრიზისის დროს ერთადერთი გამოსავალი, მაგრამ ჩვენ მზად უნდა ვიყოთ ამ არჩევნებისთვის და არა მხოლოდ იმით, რომ დავდოთ ასეთი დეტალური დოკუმენტი - პარტიები უნდა იყვნენ მზად, ახალი ძალები, რომლებიც გამოიკვეთა ამ პროტესტის დროს, ისინიც უნდა იყვნენ მზად, ვინც აპირებს, რომ ხვალინდელი ქვეყნის პოლიტიკაში იყოს - თქვენი ჯერია და მოემზადეთ, ამიტომ, რომ ეს ძალიან მალე მოვა და ამაში მეც დაგეხმარებით“, - განაცხადა სალომე ზურაბიშვილმა.

მან ხაზი გაუსვა, რომ დღეს დაცვა სჭირდება მედიას, ასევე იმ ადამიანებს, რომლებსაც საჯარო სამსახურებიდან ათავისუფლებენ.

პრეზიდენტის განცხადებით, ახლო მომავალში ის დაიწყებს მასშტაბურ შეხვედრებს საზოგადოების საზოგადოების სხვადასხვა სფეროს წარმომედგენლებთან, მათ შორის, ბიზნესთან, საჯარო მოხელეებთან, ახალ პოლიტიკურ ძალებთან, ქვეყნის გარეთ კი საერთაშორისო პარტნიორებთან და პოლიტიკოსებთან. ასევე ის გეგმავს რეგიონებში ჩასვლას.

“31-ში [დეკემბერს] რუსთაველზე ერთად შევხვდებით ახალ წელს და ეს ახალი წელი იქნება მშვიდობიანი, ბედნიერი და გამარჯვებული”, – განაცხადა სალომე ზურაბიშვილმა და პრეზიდენტის სასახლე დატოვა იქ შეკრებილ ხალხთან ერთად, გავიდა, სადაც მას მოქალაქეებმა მადლობა გადაუხადეს.