დღეს ზუგდიდის რაიონულმა სასამართლომ, მესტიაში მომხდარი ყაჩაღობისა და მკვლელობის საქმეზე ბრალდებულ ორ პირს აღკვეთის ღონისძიებად პატიმრობა შეუფარდა.

მოსამართლე შოთა ბიჭიამ სრულად დააკმაყოფილა პროკურატურის შუამდგომლობა და ორივე ბრალდებულს ორთვიანი წინასწარი პატიმრობა შეუფარდა.

ბრალდების მხარემ წინასწარი პატიმრობის შეფარდების აუცილებლობის მოტივად სხვადასხვა გარემოება დაასახელა, მათ შორის ის, რომ ორივე დაკავებილი პირობითი მსჯავრის ქვეშ არის და არსებობს მიმალვის საფრთხე.

პროკურორ დავით პაპავას განცხადებით, დაზარალებულმა ამოიცნო ის პირი, თუ ვინ განახორციელა ვიქტორ სოლოვიოვის განზრახ მკვლელობა.

,,ამოღებული არის ცეცხლსასროლი იარაღი პისტოლეტი, რომელიც იყო მკვლელობის ერთ - ერთი საგანი, შესაბამისად ასევე ვაზნა, ასევე მობილური ტელეფონის აპარატი, ასევე არის წარმოდგენილი მტკიცებულებები, დაზარეალებულმა ასევე ამოიცნო, ის პირი თუ ვინ განახორციელა ვიქტორ სოლოვიოვის განზრახ მკვლელობა, დაზარალებულის ავტომანქანიდან არანაირი სახის კანონსაწინააღმდეგო, თუნდაც ნარკოტიკული საშუალება ამოღებული არ ყოფილა’’, - განაცხადა პროკურორმა.

რევაზ პაკელიანის ადვოკატმა ვახტანგ გაბედავამ, მისი დაცვის ქვეშ მყოფის გათავისუფლება 100 000 ლარის ოდენობის გირაოს სანაცვლოდ მოითხოვა.

,,ბრალი განზრახ მკვლელობაში აქვს წარდგენილი, ეს ამბობს რომ თავდაცვის მიზნოთო, მოგერიების მიზნით სულ სხვაა, განზრახ მკვლელობა სულ სხვაა’’, - ამბობს გაბედავა.

პროკურორის კითხვაზე, გაისროლა თუ არა, დაკავებულმა რევაზ პაკელიანმა, მან თქვა, რომ თავის დაცვის მიზნით ისროლა.

ბეჟან ჭკადუას ადვოკატმა სასამართლოზე დააყენა შუამდგომლობა, რომ მისი დაცვის ქვეშ მყოფს აღკვეთის სახით 5 ათას ლაიანი გირაო შეფარდებოდა. მისი თქმით, არ არსებობს ჭკადუას ბრალის დამამტკიცებელი მასალები.

,,ბეჟან ჭკადუა არის უდანაშაულო, არანაირი კავშირი არ აქვს არც მკვლელობასთან და არც მის მოქმედებაში ყაჩაღობის შემადგენლობა აბსოლუტურად არ არსებობს, ყაჩაღობაზეა საუბარი და ამ დროს, ოქრო, ფული, ყველაფერი იყო მანქანაში, არცერთი არ არის წაღებული’’, - თქვა ლაშა ხოშტარიამ.

ზუგდიდის რაიონულ სასამართლოში მორიგი სხდომა,  25 თებერვალს ჩაინიშნა.

შეგახსენებთ, ზუგდიდი-მესტიის გზაზე ყაჩაღობა 5 იანვარს მოხდა. ორივე მამაკაცი პოლიციამ ორ დღეში დააკავა. დანაშაულები სასჯელად სხვადასხვა ზომას, მათ შორის, უვადოდ თავისუფლების აღკვეთას ითვალისწინებს.

ამავე თემაზე:

მესტიაში უცხოელი ცოლ-ქმარი დააყაჩაღეს

სვანეთში უცხოელ ტურისტებზე თავდამსხმელებს ამ დრომდე ეძებენ

პოლიციამ სვანეთში დაკარგული კაცის ცხედარი მდინარეში იპოვა, თავდამსხმელები კი დააკავეს

პროკურატურამ სვანეთში მომხდარ თავდასხმაზე ბრალდება ორ პირს წარუდგინა