2025 წლის 1 იანვრიდან აფხაზეთის დე ფქტო რესპუბლიკაში გარკვეული კატეგორიის საქონლის „იმპორტზე“ საბაჟო გადასახადი გაიზარდა.
ტელეგრამის არხის RESPUBLICA - ს თანახმად, აფხაზ მეწარმეები უკვე დადგნენ იმ ფაქტის წინაშე, რომ „საზღვარზე“ საბაჟო გადასახადები ახალი ტარიფებით იანგარიშება.

ამავე ინფორმაციით, გადასახადების გაზრდა დე ფაქტო მთავრობის 2024 წლის 31 მაისის დადგენილებით დამტკიცდა.

ამასთან, რიგ სასაქონლო პროდუქტებზე ტარიფის განაკვეთები ორჯერ, ზოგიერთ შემთხვევაში კი სამჯერ გაიზარდა.

ტელეგრამის არხი წერს, რომ აღნიშნულმა ცვლილებებმა მოსახლეობაში შეშფოთება გამოიწვია, ვინაიდან „საბაჟო გადასახადის ზრდა აუცილებლად გამოიწვევს იმპორტირებულ საქონელზე ფასების ზრდას, რაც განსაკუთრებით მძიმედ დააზარალებს რიგით მომხმარებელს“.

„აფნსიპრესის“ ცნობით, მოსკოვსა და სოხუმს შორის 2014 წლის 24 ნოემბერს გაფორმებული „ალიანსისა და სტრატეგიული პარტნიორობის შესახებ“ ხელშეკრულების მე-11 მუხლის პირველი პუნქტის შესაბამისად, „აფხაზეთმა აიღო ვალდებულება მოახდინოს საბაჟო სფეროში კანონმდებლობის ჰარმონიზაცია საქართველოს აქტებთან. ევრაზიის ეკონომიკური კავშირი (EAEU) და რუსეთის ფედერაცია შეთანხმების ძალაში შესვლის დღიდან არაუგვიანეს 3 წლისა“
აქვე აღნიშნულია, რომ ჰარმონიზაციის პროგრამის განხორციელება 2021 წელს დაიწყო და ის ასევე მოიცავდა მთელ რიგ აქტივობებს საბაჟო სფეროში. მათ შორს, „საბაჟო კოდექსის შემუშავებას, საბაჟო სატარიფო პოლიტიკის ცვლილებებს და ა.შ.“

ამასთან ხაზგასმულია, რომ შეთანხმების შესაბამისად, რუსეთში წარმოებული საქონლის ოკუპირბეულ აფხაზეთში შემოტანისას, წარმოშობის ქვეყნის სერტიფიკატის (CT-1) წარდგენისას საბაჟო გადასახადი არ იბეგრება.

ცნობისთვის, 2024 წლის სექტემბერში მოსკოვი და სოხუმი შეთანხმდნენ საქონელზე, რომელიც "უბაჟოდ" შევა რუსეთიდან აფხაზეთში

„აფხაზეთში ექსპორტირებული საქონლის გათავისუფლება დამატებითი საექსპორტო საბაჟო გადასახდელებისგან ჩვენს ქვეყნებს საშუალებას მისცემს გაზარდონ სავაჭრო ბრუნვის მოცულობა და მნიშვნელოვანი წვლილი შეიტანონ რუსეთსა და აფხაზეთს შორის საერთო სოციალური და ეკონომიკური სივრცის გაძლიერებაში“, - განმარტა რუსეთის ეკონომიკური განვითარების მინისტრის მოადგილემ დიმიტრი ვოლვაჩმა.

აქვე აღნიშნულია, რომ „აფხაზეთი მთლიანად გადავიდა ევრაზიის ეკონომიკური კავშირის საბაჟო კანონმდებლობის გამოყენებაზე“.