ზუგდიდში, მოქალაქეები სახელმწიფო რწმუნებულის ადმინისტრაციის შენობასთან პროტესტის 48-ე დღესაც შეიკრიბნენ და კიდევ ერთხელ გააჟღერეს საერთო სახალხო აქციების უცვლელი მოთხოვნები: დაინიშნოს ხელახალი არჩევნები და დაუყოვნებლივ გათავისუფლდნენ "რუსული რეჟიმის პოლიტპატიმრები".

აქციის მონაწილეები, ტრადიციულად, ქვეყანაში მიმდინარე მოვლენებს გამოეხმაურნენ, მათ შორის ზუგდიდის რაიონული სასამართლოს მიერ აქტივისტების ე.წ ბალაკლავას ტარების გამო დაჯარიმებას.

"ზუგდიდის სასამართლო, სამწუხაროდ, აღმოჩნდა პირველი, ვინც დაიწყო კანონის აბსურდული მოთხოვნის აღსრულება, არალეგიტიმური, არაკონსტიტუციური, არასამართლებრივი, რეპრესიული მუხლების აღსრულება. დღეს ბათუმში ვიხილეთ უმძიმესი ამბავი, "ბათუმელებისა" და "ნეტგაზეთის" ხელმძღვანელი, რომელიც ყველა ხელისუფლების პირობებში იყო ქართული მედიის სინდისი, ერთ-ერთი ყველაზე წესიერი ჟურნალისტი, რომელიც სასამართლომ გაუშვა ორთვიან წინასწარ პატიმრობაში. ეს გადაწყვეტილება, რასაც ივანიშვილის პირადი მოსამართლე და პროკურორი, ასევე, მაღალჩინოსნები პოლიციიდან იღებენ, მიმართულია საქართველოში დიქტატურის და ავტორიტარიზმის დამყარებისკენ", - აღნიშნა სიტყვით გამოსვლისას "საერთაშორისო გამჭვირვალობა - საქართველოს" რეგიონული ოფისის ხელმძღვანელმა არჩილ თოდუამ.

მოქალაქეები, წვიმიანი ამინდის მიუხედავად, აქციაზე საქართველოსა და ევროკავშირის დროშებით, ასევე, საპროტესტო ბანერებით მივიდნენ.

მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, პერმანენტული საპროტესტო აქციები იმართება.

ამავე თემაზე:

მე, თქვენი სახელით, ზუგდიდის სახელით იქაც ჩავალ, ვაშინგტონში, - სალომე ზურაბიშვილი ზუგდიდის აქციაზე (ფოტო/ვიდეო)

ზუგდიდში საპროტესტო აქცია დაიწყო (ფოტო)

„ირო წიმი ევროპაშა“, - ახალი წლის პირველ დღეებში აქცია ზუგდიდში უწყვეტად გრძელდება (ფოტო)

რეჟიმის პატიმრების გათავისუფლება და ხელახალი არჩევნების ჩატარება - პროტესტის 44- ე დღე ზუგდიდში (ფოტო)