აფხაზმა ოპოზიციონერებმა ლევან მიქაამ და კან კვარჩიამ პრესკონფერენცია გამართეს, რომელზეც მათთვის რუსეთის მოქალაქეობის ჩამორთმევაზე ისაუბრეს.

მათი თქმით, რუსეთის მოქალაქეობის ჩამორთმევაზე ოფიციალური შეტყობინება არ მიუღიათ და მიაჩნიათ, რომ არ დაურღვევიათ რუსეთის ფედერაციის კანონი და „რუსეთის წინააღმდეგ არავითარი ქმედება არ ჩაუდენიათ“.

„ჩვენ ყოველთვის ჩვენი სამშობლოს ინტერესებით ვმოქმედებდით და არა რუსეთის ფედერაციის საზიანოდ“, - თქვა, რომ ლევან მიქაამ.

„მათ უნდათ ჩვენი გატეხვა, უნდათ გვაიძულონ... და თუ ჩვენ არ ვფიქრობთ, რომ ეს სწორია, ეს არ ნიშნავს, რომ ჩვენ ვართ რუსეთის მტრები“,- აღნიშნა კან კვარჩიამ.

ოპოზიციონერები მიიჩნევენ, რომ „მთავრობა არაფერს აკეთებს, თუნდაც მიზეზის გასარკვევად“, რის საფუძველზეც მათ რუსეთის მოქალაქეობა ჩამოერთვათ.  მათი მტკიცებით, ეს ყოფილი ე.წ. პრეზიდენტის ასლან „ბჟანიას სიების მიხედვით“  კეთდება. 

ნუჟნაია გაზეტას“ თანახმად, კან კვარჩიამ არა მარტო საპრეზიდენტო კანდიდატებს, არამედ ვიცე-პრეზიდენტობის კანდიდატებსაც მოუწოდა, შეაფასონ ინფორმაცია აფხაზეთის მოქალაქეებისთვის რუსეთის მოქალაქეობის ჩამორთმევის შესახებ.

„პარლამენტის დეპუტატი ვარ, ეს სილის გაწვნაა აფხაზეთის სახელმწიფოსთვის“, - განაცხადა კვარჩიამ.

ცოტა ხნის წინ, რუსული ტელეგრამის არხები იუწყებოდნენ, უსაფრთხოების ძალების წყაროებზე დაყრდნობით, რომ აფხაზ ოპოზიციონერსა და ბიზნესმენს, ლევან მიქაას რუსეთის მოქალაქეობა ჩამოერთვა. ის, 2024 წლის ნოემბერში სოხუმში მიმდინარე საპროტესტო აქციების მონაწილეა, რასაც მოჰყვა ასლან ბჟანიას გადადგომა და ვადამდელი „საპრეზიდენტო“ არჩევნების დანიშვნა.

მანამდე, 10 იანვარს, აფხაზური „პრო-სამთავრობო“ ტელეგრამის არხი AMRA-life, წყაროზე დაყრდნობით, წერდა, რომ რუსეთის მოქალაქეობა ჩამოერთვა ოპოზიციონერ "დეპუტატს" კან კვარჩიას.

რუსული ტელეგრამის არხი " რიბარი"  მიუთითებდა, რომ კან კვარჩია, ადგურ არძინბასთან ერთად, „გასული წლის შემოდგომაზე სახელმწიფო გადატრიალების ერთ-ერთი ინიციატორი იყო".

შეგახსენებთ, რომ კვარჩია 15 თებერვალს დაგეგმილ საპრეზიდენტო არჩევნებში მონაწილეობას გეგმავდა, თუმცა კანდიდატურა მოხსნა, ჯანმრთელობის მდგომარეობსი გამო.  19 დეკემბერს ე.წ. პარლამენტის შენობაში მისი მიმართულებით ისროლა „დეპუტატმა“ ადგურ ხარაზიამ. შედეგად, კვარჩია დაიჭრა, ხოლო მისი კოლეგა, ვახტანგ გოლანძია, მიყენებული ჭრილობებისგან გარდაიცვალა. ადგურ ხარაზია მიიმალა და მას ამ დრომდე ეძებენ.

ცნობისთვის, აფხაზეთის დე ფაქტო რესპუბლიკის ეკონომიკის ყოფილი „მინისტრი“ და „აფხაზეთის სახალხო მოძრაობის“ ლიდერი ადგურ არძინბა, ერთ - ერთია იმ 5 კანდიდატს შორის, რომელიც კენჭს იყრის 15 თებერვალს დაგეგმილ „საპრეზიდენტო“ არჩევნებში. აფხაზური მედიის თანახმად, მისი მთავარი კონკურენტია, დე ფაქტო რესპუბლიკის ყოფილი „ვიცე პრემიერი“, ბადრა გუნბა. 

2024 წლის აგვისტოს ბოლოს აფხაზურმა ტელეგრამის არხებმა გაავრცელეს ინფორმაცია, რომ თვითგამოცხადებული რესპუბლიკის მაშინდელმა „პრეზიდენტმა“ ასლან ბჟანიამ რუსეთის ფედერაციის ვიცე-პრემიერ ალექსანდრ ნოვაკთან შეხვედრაზე „აპარტამენტების კანონის" მოწინააღმდეგე ე.წ. დეპუტატებისთვის რუსეთის მოქალაქეობის ჩამორთმევის საკითხი განიხილა.

ამავე ცნობით, ბჟანიას 2024 წლის 20 სექტემბრამდე უნდა მიეწოდებინა მოსკოვისთვის ინფორმაცია აფხაზური ოპოზიციის იმ დეპუტატებისა და ლიდერების შესახებ, რომლებსაც აქვთ რუსეთის მოქალაქეობა და „მოქმედებენ რუსეთის ფედერაციის ინტერესებისა და რუსეთ-აფხაზური ურთიერთობების განვითარების საზიანოდ. ბჟანიამ არ უარყო, რომ ეს საკითხი განიხილებოდა, თუმცა განაცხადა, რომ მას არ აუღია ვალდებულება, რუსული მხარისთვის ინფორმაციის მიწოდების შესახებ.

19 ნოემბერს, აფხაზი ლიდერის, ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ, რუსეთმა სრულად შეუჩერა დე ფაქტო რესპუბლიკას დაფინანსება.