„რესპუბლიკაში ელექტროენერგიის მოხმარებასთან დაკავშირებით მდგომარეობა არ გაუმჯობესებულა, ჯვარის წყალსაცავში წყლის შემოდინება მინიმალურია, გამომუშავება მილიონ კვტ/სთ-ს აღწევს, რაც ძალიან ცოტაა“, - ამის შესახებ სოხუმში, ენერგეტიკული უსაფრთხოების შტაბის სხდომაზე, აფხაზეთის დე ფაქტო რესპუბლიკის ე.წ. პრეზიდენტის მოვალოების შემსრულებელმა ვალერი ბგანბამ განაცხადა.
მისივე თქმით, რუსული ელექტროენერგიის მოცულობა, რომელსაც აფხაზეთი მოიხმარს, იზრდება.

„ჩვენ დღეში დაახლოებით 7,5 მლნ კვტ/სთ-ს მოვიხმართ, საიდანაც 6 მლნ მოდის რუსეთიდან მომდინარე ნაკადზე. ამ ყველაფერმა შეიძლება გამოიწვიოს ის ფაქტი, რომ თებერვლის დასაწყისში შესაძლოა ელექტროენერგიის გარეშე აღმოვჩნდეთ. ჩვენ უნდა გავაძლიეროთ ჩვენი ძალისხმევა ელექტროენერგიის უკანონო მოხმარების წინააღმდეგ საბრძოლველად“, - თქვა ბგანბამ.

ენერგეტიკისა და ტრანსპორტის ე.წ. მინისტრმა ჯანსუხ ნანბამ განაცხადა, რომ აფხაზური მხარე უკვე აწარმოებს მოლაპარაკებებს რუსულ კომპანია InterRAO-სთან, რომ შეათანხმოს „კომერციული ნაკადის შესაძენად ყველაზე ოპტიმალური ვარიანტი“. მისივე განმარტებით, რუსული „სოციალური ნაკადის“ დარჩენილი ნაწილი ჯვარის წყალსაცავში წყლის დონის მომატებამდეც არ ეყოფათ.

კომპანია „ჩერნომორენერგოს“ ხელმძღვანელმა, თემურ ჯინჯოლიამ განაცხადა, რომ 1 იანვრიდან დღემდე დე ფაქტო რესპუბლიკაში ელექტროენერგიის მთლიანმა მოხმარებამ 207 მილიონ 186 ათასი კვტ/სთ შეადგინა.

„აქედან ოდნავ მეტი 38 მლნ კვტ/სთ ინგურჰესიდან მივიღეთ, 163 მლნ 800 ათასი კვტ/სთ რუსეთიდან, ხოლო 5 მილიონ 355 ათას კვტ/სთ სოხუმჰესიდან. მისი თქმით, მოხმარების დონე, დღევანდელი შესაძლებლობებიდან გამომდინარე, კვლავ მაღალია“, - თქვა მან.

ენერგოკომპანიის გენერალური დირექტორის თქმით, კრიპტოვალუტის უკანონო მაინინგი ყოველდღიურად 25-დან 27 მეგავატამდე მოიხმარს.

„მოხმარების ამჟამინდელი დონის პირობებში ქვეყნის ელექტროენერგიით მომარაგება მხოლოდ 15-17 თებერვლამდე იქნება შესაძლებელი“, - დასძინა ჯინჯოლიამ.

„აფსნიპრესის“ თანახმად, შეხვედრაზე აღინიშნა, რომ „უკანონო მაინინგთან ბრძოლის გაძლიერების მიზნით, აფხაზეთის ყველა რაიონსა და ქალაქში ოპერატიული შტაბი შეიქმნება“.

ცნობისთვის, 9 იანვრიდან ოკუპირებულ აფხაზეთში ელექტროენერგიის მოხმარებაზე ახალი შეზღუდვები დაწესდა.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.