წალენჯიხის მუნიციპალიტეტის სოფელ ჯგალის მოსახლეობა წყალმომარაგების პრობლემის მოგვარებას ითხოვს. მათ, პროტესტის ნიშნად, წალენჯიხა-ჩხოროწყუს ცენტრალური გზა გადაკეტეს.

რადიო „ათინათს“ წალენჯიხის მუნიციპალიტეტის მერის მოადგილემ თამარ ბელქანიამ უთხრა, რომ მოქალაქეების მოთხოვნა ლეგიტიმურია, რადგან, როგორც ის ამბობს, აღნიშნული პრობლემის მოგვარებას სახელმწიფო რწმუნებული მათ წინასაარჩევნოდ დაჰპირდა.

„ამ წუთებშიც გადაკეტილია მოძრაობა. მერია ვერ დაამყარებს ურთიერთობას კერძო კომპანიასთან, მათი (სახელმწიფო რწმუნებულის ადმინისტრაციის) პრეროგატივაა ეს. გუბერნატორი ჩამოვიდა და დაჰპირდა, თუმცა დღემდე შეუსრულებელი დარჩა. მოსახლეობა ახლაც გარეთაა, მანქანების მოძრაობა პარალიზებულია, რეალურად ხალხს აქვს ლეგიტიმური მოთხოვნა. მათ უნდათ წყალი“

ბელქანიას განმარტებით, ის უკვე ესაუბრა სამხარეო ადმინისტრაციის წარმომადგენლებს და როგორც აღნიშნავს, სავარაუდოდ, ახლად დანიშნული გუბერნატორი იმუშავებს, როგორ მოაგვაროს პრობლემა.

აღნიშნულ საკითხზე ჩვენ სახელმწიფო რწმუნებულის ადმინისტრაციას დავუკავშირდით. მათგან კომენტარის მიღებისას, მასალა განახლდება.


ფოტო: ფორმულა