აფხაზეთის დე ფაქტო რესპუბლიკის ე.წ. საგარეო საქმეთა სამინისტროს ელჩმა კომენტარი გააკეთა ქართული ოპოზიციის მოწოდებაზე სირიის ხელისუფლებისადმი აფხაზეთის აღიარების გაუქმების შესახებ.
მისი თქმით, ეს განცხადებები „სხვა არაფერია, თუ არა პოლიტიკური რიტორიკა, რომელსაც, რეალური პერსპექტივა არ აქვს“.

„სახელმწიფოს, რომელმაც აღიარა სხვა ქვეყნის დამოუკიდებლობა, შეუძლია გადაწყვიტოს მხოლოდ დიპლომატიური ურთიერთობების გაწყვეტა, მაგრამ ეს არ არის თავად აღიარების იურიდიული გაუქმების ტოლფასი. უფრო მეტიც, დიპლომატიური ურთიერთობები ნებისმიერ დროს შეიძლება აღდგეს, რაც ქართველი პოლიტიკოსების მსგავს განცხადებებს წმინდა პოპულისტურ და იურიდიულად გაუმართლებელს ხდის“ , - აცხადებს ტანია.

მისი მტკიცებით, ოკუპირებულ აფხაზეთსა და სირიას შორის არსებული ურთიერთობები „ვითარდება გრძელვადიანი პარტნიორობის ფარგლებში, რომელიც დაფუძნებულია ურთიერთპატივისცემასა და ისტორიულ კავშირებზე“.

„აფხაზეთთან დიპლომატიური კავშირების გაწყვეტა სირიას არანაირ პოლიტიკურ და ეკონომიკურ სარგებელს არ მოუტანს, პირიქით, შეიძლება გაართულოს ისედაც დაძაბული გეოპოლიტიკური ვითარება“, - აცხადებს „საგარეოს“ წარმომადგენელი.

ტანია დარწმუნებულია, რომ სოხუმი გააგრძელებს , „ისტორიულ მემკვიდრეობაზე დაფუძნებული“, მეგობრული ურთიერთობების განვითარებას დამასკოსთან და იმედი გამოთქვა, რომ სირიის ახალი ხელმძღვანელობის „პრაგმატული და დამოუკიდებელი“ კურსი უცვლელი დარჩება.

ოთხმა ოპოზიციურმა პარტიამ, 31 იანვარს, სირიის ლიდერს, აჰმედ ალ-შარაას ახალ ხელისუფლებას, რუსეთის მიერ საქართველოს დროებით ოკუპირებული ტერიტორიების აღიარების გაუქმების თხოვნით მიმართა.

საქართველოს რეგიონების - აფხაზეთის და ე.წ. სამხრეთ ოსეთის "დამოუკიდებლობა" , სირიის მაშინდელმა ხელისუფლებამ, 2018 წლის მაისში აღიარა.

2020 წლის 6 ოქტომბერს დამასკოში  "აფხაზეთის საელჩო" გაიხსნა.