ადგილობრივი დროით 18:00 საათის მონაცემებით, აფხაზეთის ვადამდელ “საპრეზიდენტო” არჩევნებზე ამომრჩეველთა აქტივობამ 55% შეადგინა (79019 ადამიანი), - ამის შესახებ თვითაღიარებული რესპუბლიკის ცენტრალური საარჩევნო კომისიის თავმჯდომარემ დიმიტრი მარშანმა ბრიფინგზე განაცხადა. მისივე თქმით, ამდენად, არჩევნები შედგა.

ამავე ცნობით, არჩევნები ჩატარებულად ითვლება, თუ კენჭისყრაში მონაწილეობა მიიღო ამომრჩეველთა სიებში შეყვანილ ამომრჩეველთა ნახევარზე მეტმა. გაიმარჯვებს ის კანდიდატი, რომელიც ამომრჩეველთა საერთო რაოდენობის 50%-ზე მეტ ხმას დააგროვებს.

დღეს, 15 თებერვალს, აფხაზეთის დე ფაქტო რესპუბლიკაში ვადამდელი „საპრეზიდენტო“ არჩევნები იმართებოდა. 

დე ფაქტო ცესკოს ცნობით, ერთიან საარჩევნო სიაში 135 ათასამდე ამომრჩეველი იყო რეგისტრირებული. კენჭისყრისთვის 152 საარჩევნო უბანი გაიხნა,
მათ შორის ორი - რუსეთის ორ ქალაქში (მოსკოვსა და ჩერქესკში).

არჩევნების წინა დღეს თურქეთის ქალაქ საკარიაში, სადაც აფხაზური დიასპორის მნიშვნელოვანი ნაწილი ცხოვრობს, საარჩევნო უბანი დაიხურა. 

ცმობისთვის, „პრეზიდენტობისთვის“ 5 კანდიდატი იბრძვის. მათ შორის, ყველაზე დიდ კონკურენტებად ბადრა გუნბა და ადგურ არძინბა მიიჩნევიან.

"პრეზიდენტის" მოვალეობის შემსრულებელი, ბადრა გუნბა, ბჟანიას თანაგუნდელია და კრემლის ფავორიტად ითვლება. 

ეკონომიკის ყოფილი "მინისტრი", აფხაზი ოპოზიციონერი, ადგურ არძინბა, მონაწილეა 2024 წლის საპროტესტო აქციის, რომლის შედეგადაც გადადგა ყოფილი აფხაზი ლიდერი ასლან ბჟანია და ჩავარდა სოხუმსა და მოსკოვს შორის საინვესტიციო ხელშეკრულების რატიფიცირება.

„პრეზიდენტობის“ დანარჩენი კანდიდატები არიან:

სოხუმის ყოფილი "სავაჭრო წარმომადგენელი მოსკოვში" - ოლეგ ბარციცი;

"კონტროლის პალატის" ყოფილი ხელმძღვანელი - რობერტ არშბა;

კომერციული "შავი ზღვის განვითარების ბანკის" გამგეობის თავმჯდომარე, ადგურ ხურხუმალი.

ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.