ზუგდიდის მუნიციპალიტეტში დიდთოვლობის გამო, რამდენიმე ადმინისტრაციულ ერთეულს ელექტროენერგია შეზღუდულად მიეწოდება. ამის შესახებ რადიო „ათინათს“ „ენერგო-პრო ჯორჯიაში“ განუცხადეს.

კომპანიაში განმარტავენ, რომ ამ დროისთვის ელექტროენერგია არ არის ცაიშის, დარჩელის, ყულიშკარის, ცაცხვის და მიმდებარე სოფლების ნაწილში, სადაც, როგორც ამბობენ, შესაბამისი სამსახურები უკვე მუშაობენ და, სავარაუდოდ, დღის ბოლომდე მოსახლეობის ნაწილს ელექტროენერგიის მიწოდება აღუდგება.

მათივე თქმით, ადმინისტრაციულ ერთეულებში რთული მეტეოროლოგიური პირობები და გადაადგილების პრობლემა სამუშაოების წარმოებისთვის მეტ დროს საჭიროებს.

ამასთან, „ენერგო-პრო ჯორჯიას“ ვებ გვერდზე აღნიშნულია, რომ განსაკუთრებით რთული მდგომარეობაა რამდენიმე მუნიციპალიტეტში, მათ შორის, მარტვილში და აბაშაშიც.

„სარეაბილიტაციო სამუშაოებს ხელს უშლის გადაადგილების პრობლემა, სადაც სპეციალური ტექნიკა მისვლას ვერ ახერხებს, ელექტრიკოსებს ფეხით უწევთ დაზიანების ადგილებამდე მისვლა. არის ადგილები, სადაც ჯერჯერობით ფეხითაც ვერ ხერხდება მიახლოება. დიდთოვლობის შედეგად გადატეხილი ხეები დაეცა ელექტროგადამცემ ხაზებს. სტიქიამ მწყობრიდან გამოიყვანა სხვა ენერგოინფრაქსტუქტურაც.

,,სტიქიის დაწყებიდან მოკლე დროში მოვახდინეთ შესაბამისი ტექნიკის და სამუშაო ცოცხალი ძალის მობილიზება. ვმუშაობთ შეუსვენებლად. ვცდილობთ მივიდეთ ყველგან, სადაც ეს შესაძლებელია თუ შეუძლებელი. სამუშაოები გაგრძელდება იქამდე, სანამ არ აღდგება ყველა დაზიანებული ენერგოინფრასტუქტურა და აღუდგება ელექტროენერგიის მიწოდება ყველა აბონენტს“, - ვკითხულობთ ინფორმაციაში.