სამეგრელოში 28 თებერვალს უნალექო ამინდია მოსალოდნელი, თუმცა ღამის საათებში ყინვა გაძლიერდება და ტემპერატურა დაბლობ რეგიონებში -5, -10 გრადუსამდე დაიკლებს. ამის შესახებ გარემოს ეროვნული სააგენტოს მონიტორინგისა და პროგნოზირების ცენტრის მოკლევადიანი პროგნოზების სამმართველოს უფროსმა დოდო გვაზავამ გვითხრა.

მისი ინფორმაციით, მთიან რეგიონებში ღამით ნავარაუდევია -10, -15, მესტიაში კი -17, -22 გრადუსი.

„დღისით ჰაერი მზის ხარჯზე გათბება და მაქსიმალურ ტემპერატურას, 3-5 გრადუსს მიაღწევს დაბლობ რაიონებში, მთებში -5, 0, მაღალ მთაში კი -7, -2. 1-ელ მარტს, სამეგრელოში უმეტესად უნალექო ამინდს ვვარაუდობთ. შესაძლოა იყოს სუსტი თოვა, უმნიშვნელო, მხოლოდ დღისით. მომდევნო ორი დღის განმავლობაში თოვლი და თოვლ-ჭყაპი იქნება. ხოლო 5-6 მარტს შესაძლებელია დღის მაქსიმალურმა ტემპერატურამ 12 გრადუსს მიაღწიოს“, - ამბობს გვაზავა.

ცნობისთვის, რამდენიმე დღეა დასავლეთ საქართველოში დიდთოვლობაა. დაზიანდა ელექტროგადამცემი ხაზები, ბუნებრივი აირის მილები, ინფრასტრუქტურა და საცხოვრებელი სახლები. განსაკუთრებით რთული ვითარებაა გურიის რეგიონში, სადაც რამდენიმე სოფელი გარესამყაროს მოწყდა.

დიდთოვლობის, ხილვადობის გაუარესების, ქარბუქის, ლიპყინულის და ზვავსაშიშროების გამო, საავტომობილო გზების ცალკეულ მონაკვეთებზე ამ დრომდე ტრანსპორტის მოძრაობის სპეციალური რეჟიმი მოქმედებს.