25-დან 27 მარტის ჩათვლით, „არტ მეურნეობის“ სახელოვნებო სივრცეში, უტრეხტის უნივერსიტეტის პროფესორთან, იან ბრურსენთან შეხვედრების სერია 18:00 საათზე გაიმართება.

ღონისძიების ორგანიზატორების ინფორმაციით, შეხვედრის თემაა ხელოვნური ინტელექტის (AI) მუშაობის პრინციპები, შესაძლებლობები და მისი გავლენა ჩვენს ყოველდღიურ ცხოვრებაზე.

„ხელოვნური ინტელექტი (AI) სწრაფად ვითარდება და გავლენას ახდენს ყველაფერზე — მედიცინიდან და სამართლებრივი სისტემებიდან, ხელოვნებასა და ყოველდღიურ ცხოვრებამდე. ამიტომ მნიშვნელოვანია ზუსტი ინფორმაცია გვქონდეს იმაზე, თუ რა შესაძლებლობები და შეზღუდვები გააჩნია მას“, - ვკითხულობთ დაანონსებული ღონისძიების აღწერაში.

მათივე ინფორმაციით, იან ბრურსენი უტრეხტის უნივერსიტეტის ფილოსოფიისა და რელიგიის კვლევების დეპარტამენტის ხელოვნურ ინტელექტში ლოგიკური მეთოდების პროფესორია, მიღებული აქვს მათემატიკის ხარისხი დელფტის ტექნოლოგიურ უნივერსიტეტში, ხოლო დოქტორის ხარისხი ამსტერდამის VU უნივერსიტეტში, სადაც მისი კვლევა ნორმატიული სისტემების ვერიფიკაციისთვის მოდალურ ლოგიკებს ეხებოდა. ამასთან, ბრურსენი მუშაობს ხელოვნური ინტელექტის ეთიკურ და სოციალური პასუხისმგებლობის საკითხებზე. მისი ძირითადი კვლევის სფერო მოიცავს AI-ის ფილოსოფიას და მისი ზეგავლენის შეფასებას ადამიანურ სისტემებზე.