საქართველოს პირველი პრეზიდენტი და ეროვნული გმირი ზვიად გამსახურდია დღეს 86 წლის გახდებოდა. ის 1939 წლის 31 მარტს დაიბადა გამოჩენილი ქართველი მწერლის კონსტანტინე გამსახურდიასა და მირანდა ფალავანდიშვილის ოჯახში.

მან დაამთავრა თბილისის 47-ე საშუალო სკოლა (1957) და თბილისის სახელმწიფო უნივერსიტეტის დასავლეთ ევროპის ენებისა და ლიტერატურის ფაკულტეტი ინგლისური ლიტერატურის სპეციალობით.

პროფესიით პოლიტიკოსი, მწერალი, მთარგმნელი, ფილოლოგიის მეცნიერებათა დოქტორი, ეროვნულ-გამანთავისუფლებელი მოძრაობის ლიდერი 50-იანი წლებიდან გახდა. 

მოგვიანებით მან შექმნა პოლიტიკური ბლოკი "მრგვალი მაგიდა - თავისუფალი საქართველო". ბლოკმა 1990 წლის 28 ოქტომბრის პირველ დემოკრატიულ და მრავალპარტიულ არჩევნებში გაიმარჯვა. საქართველოს რესპუბლიკის უზენაესი საბჭოს პირველ სესიაზე კი ზვიად გამსახურდია უზენაესი საბჭოს თავმჯდომარედ აირჩიეს. ამ მოვალეობას ის 1991 წლის მარტამდე ასრულებდა.

1991 წლის დეკემბერს საქართველოს ეროვნული ხელისუფლების წინააღმდეგ სამხედრო გადატრიალება დაიწყო, რის შემდეგაც გამსახურდია იძულებული გახდა თბილისი დაეტოვებინა. ის, 1993 წლის 31 დეკემბერს, დევნილობაში, ხობის რაიონის სოფელ ახალ ხიბულაში, ღურწკაიების საცხოვრებელ სახლში თავის არეში მიყენებული ცეცხლსასროლი ჭრილობით, 54 წლის ასაკში დაიღუპა. ოფიციალური ვერსიით მან თავი მოიკლა, რასაც ოჯახი ამ დრომდე არ ეთანხმება და მიიჩნევს, რომ გამსახურდია მოკლეს.

გარდაცვალების შემდეგ, გამსახურდიას ცხედარი საიდუმლო ვითარებაში დაკრძალეს, 1994 წლის თებერვალში კი ქალაქ გროზნოში გადაასვენეს.

2007 წლის 28 მარტს, ცხედარი ჩამოასვენეს და ამავე წლის პირველ აპრილს, მთაწმინდის საზოგადო მოღვაწეთა პანთეონში დაკრძალეს.

2013 წლის 26 სექტემბერს, საქართველოს პირველ პრეზიდენტს ეროვნული გმირის წოდება მიენიჭა.