ოკუპირებული აფხაზეთის ახლად არჩეული ე.წ. პრეზიდენტის „ინაუგურაციას“, რომელიც 2 აპრილს გაიმართა, რუსეთის პრეზიდენტის ადმინისტრაციის უფროსის პირველი მოადგილე სერგეი კირიენკო ესწრებოდა.

მან ცერემონიაში მონაწილეებს ვლადიმირ პუტინის მისალოცი ტექსტი გააცნო, რომელშიც ნათქვამია, რომ "რუსეთსა და აფხაზეთს შორის ურთიერთობები ვითარდება მეგობრობისა და მოკავშირეობის სულისკვეთებით“ და რომ „რუსეთისა და აფხაზეთის ძმურ ხალხებს საერთო ისტორია აკავშირებთ“.

„ჩვენს საერთო გამარჯვებაში განსაკუთრებული მნიშვნელობა აქვს დიდ სამამულო ომში აფხაზეთის მრავალეროვანი ხალხის წვლილს. მნიშვნელოვანი თარიღის აღნიშვნისას, რუსები და აფხაზები პატივს მიაგებენ გამარჯვებულთა გმირულ თაობას“, - ხაზგასმულია პუტინის მისალოც ტექსტში.

ამის შემდეგ, კირიენკომ დამსწრეებს მოკლე სიტყვით მიმართა, რომელშიც რუსები და აფხაზები თავისუფლებისათვის მებრძოლ ძმებად მოიხსენია, ხოლო ქართულ - აფხაზური კონფლიქტის მონაწილე ქართველები კი - ნეონაცისტებად. მისი თქმით, „აფხაზეთსა და რუსეთს აერთიანებთ აფხაზი და რუსი ერების გმირი შვილები, რომლებიც მხარდამხარ იბრძოდნენ და სიცოცხლეს სწირავდნენ აფხაზეთის დამოუკიდებლობას“.

„1992-93 წლებში აფხაზეთი ალბათ პოსტსაბჭოთა სივრცეში პირველი იყო, ვინც რეალურად შეეჯახა ნეონაციზმს. ჯერ კიდევ მაშინ ნაცისტური ქვედანაყოფები, რომლებიც ახლა სპეციალური სამხედრო ოპერაციის ზონაში იბრძვიან რუსეთის წინააღმდეგ, განადგურებას უპირებდნენ აფხაზეთის დამოუკიდებლობას.

რუსეთიდან ჩამოსული მოხალისეები, რომლებმაც თავიანთი სიცოცხლე შესწირეს აფხაზეთს, რა თქვმ უნდა, რუსეთის შვილები არიან და ჩვენ ვამაყობთ მათით. დარწმუნებული ვარ, რომ თქვენც ამაყობთ. ისევე როგორც მრავალეროვნული აფხაზეთის 53 გმირმა თავი გასწირა სპეციალური სამხედრო ოპერაციის მსვლელობისას. ჩვენ გვესმის, რომ აფხაზი ხალხისთვის 53 შვილის სიცოცხლე - ეს ძალიან დიდი დანაკარგია", - თქვა სერგეი კირიენკომ.

"ინაუგურაციის" დასრულების შემდეგ, მან აღნიშნა, რომ რუსეთს ბელარუსთან სამოკავშირეო სახელმწიფოს მშენებლობის ფარგლებში პარტნიორული ურთიერთობების კარგი გამოცდილება დაუგროვდა, რასაც, მისი თქმით, „მოსკოვი აუცილებლად გამოიყენებს აფხაზეთთან დაახლოების, სტრატეგიული პარტნიორობის მშენებლობის პროცესში“.

რუსეთის პრეზიდენტის ადმინისტრაციის ხელმძღვანელის მოადგილე სერგეი კირიენკო აფხაზური მიმართულების კურატორად 2025 წლის იანვარში დაინიშნა.

2022 წლიდან "აფხაზეთთან და სამხრეთ ოსეთთან თანამშრომლობის კურატორი" ალექსანდრ ნოვაკი იყო; მანამდე ამ ფუნქციას მარატ ხუსნულინი ასრულებდა.