ზუგდიდში, 9 აპრილის მემორიალთან პოლიციელებმა ძალის გამოყენებით დაშალეს იქ მშვიდობიანად მდგომი მოქალაქეები, რა დროსაც, ერთ- ერთი მათგანი წააქციეს და მისი ჰოსპიტალიზაცია გახდა საჭირო. ამის შესახებ არჩილ თოდუა წერს, რომელიც ადგილზე იმყოფებოდა.

„9 აპრილს, ზუგდიდში, 9 აპრილის მემორიალთან სრულიად მშვიდობიანად მდგომი მოქალაქეები რეჟიმის 200 - მდე პოლიციელმა ძალის გამოყენებით გაგვყარა ადგილიდან. ხათუნა ჯაპავა წააქციეს და ახლა რუხის კლინიკაშია გადაყვანილი“, - ვკითხულობთ პოსტში.

ცოტა ხნის წინ, ზუგდიდში, 9 აპრილის მემორიალთან მყოფ მოქალაქეებთან პოლიცია მივიდა და იქ შეკრებილების დაშლა დაიწყო, იმ მიზეზით, რომ სასულიერო პირებს დაღუპულთა სულის მოსახსენიებლი პარაკლისი უნდა გადაეხადათ.

მიუხედავად იმისა, რომ შეკრებილები კანონს არ არღვევდნენ და პარაკლისზე დასწრების სურვილიც გამოთქვეს, პოლიციამ მათ ამის საშუალება არ მისცა.

მათივე თქმით, სამართალდამცველები მას შემდეგ დაიშალნენ, რაც 9 აპრილის მემორიალთან მისულმა ადგილობრივი ხელისულფების წარმომადგენლებმა დატოვეს ტერიტორია.

სამოქალაქო აქტივისტები, მოქალაქეები, ზუგდიდის უწყვეტი პროტესტის მონაწილეები, ამ დროისათვის, ისევ დაბრუნდნენ 9 აპრილის მემორიალთან, სადაც მათი ნაწილი, მთელი ღამის განამვლობაში რჩებოდა.

ცნობისთვის, რუსთაველის გამზირზე ღამე გაათენეს 2024 წლის 28 ნოემბრიდან დაწყებული პროევროპული აქციების მონაწილეებმა. ღამისთევის ინიციატორები იყვნენ დაპატიმრებული დემონსტრანტების მშობლები, რომლებმაც დააარსეს ახალი მოძრაობა „სინდისის პატიმრების თავისუფლებისთვის“.

ღამისთევას ზუგდიდშიც შეუერთდნენ, მოქალაქეებმა ღამე 9 აპრილის მემორიალთან გაათენეს.

36 წელი გავიდა 9 აპრილის ტრაგიკული მოვლენებიდან. 1989 წლის 9 აპრილს, გამთენიისას საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რასაც ადამიანთა მსხვერპლი მოჰყვა.

დარბევის შედეგად 21 ადამიანი დაიღუპა, უმეტესად - ქალები. დაშავდა და დაუდგენელი შემადგენლობის გაზით მოიწამლა აქციის ასობით მონაწილე.

ამავე თემაზე:

ზუგდიდში 9 აპრილის მემორიალთან შეკრებილი მოქალაქეები პოლიციამ დაშალა (ფოტო/ვიდეო)