სოხუმის აეროპორტის ვებგვერდი, ამოქმედდა. ამის შესახებ „აფსნიპრესი“ იტყობინება.

ამავე ცნობით, ვებგვერდზე: https://sukhumaero.com/, განთავსებულია სრული და აქტუალური ინფორმაცია აეროპორტის ფუნქციონირების ყველა ასპექტის, ასევე" აეროპორტის ისტორიის, მართვისა და სტრატეგიული მიზნების შესახებ".

"მომხმარებლებს ასევე შეეძლებათ ვებგვერდზე მოიძიონ ინფორმაცია აეროპორტამდე მისვლის შესახებ, ტერმინალის რუკა და ხშირად დასმულ კითხვებზე პასუხები“, - წერს გამოცემა.


მანამდე, რუსეთის ტრანსპორტის სამინისტრო იტყობინებოდა, რომ „სოხუმის მიმართულებით ბილეთების გაყიდვა გახსნილია“. ამავე ცნობით, პირველი რეისი 3 მაისს არის დაგეგმილი.

განცხადებაში ვკითხულობთ, რომ მას ავიაკომპანია „UVT AERO“ ვნუკოვოს აეროპორტიდან შეასრულებს, 6 მაისიდან კი „Ikar Airlines“- ი დაიწყებს ფრენებს, ნიჟნი ნოვგოროდიდან სოხუმის მიმართულებით .

მოგვიანებით, აფხაზეთის თვითგამოცხადებული რესპუბლიკის ენერგეტიკისა და ტრანსპორტის სამინისტრომ განაცხადა, რომ პირველი რეისი მოსკოვიდან 1 მაისს შესრულდება, სამომავლოდ კი ფრენები შაბათობით განხორციელდება.
ავიაკომპანია „UVT AERO“-ს ვებგვერდზე მიმართულების შერჩევისას თავდაპირველად სახელწოდებად მითითებული იყო „სოხუმი, ბაბუშერა“, შემდეგ გვერდი განახლდა და გამოჩნდა წარწერა „სუხუმ, დრანდა“.

მანამდე გავრცელდა ინფორმაცია, რომ როსავიაციამ ოკუპირებული აფხაზეთის მიმართულებით ფრენების ნებართვა გასცა ავიაკომპანია iFly-ზე მოსკოვიდან, ხოლო Nordstar- ზე მოსკოვიდან და კრასნოიარსკიდან. თუმცა, ამ გადამზიდავების ფრენების დაწყების თარიღები ჯერჯერობით არ არის მითითებული.

აღსანიშნავია, რომ ოთხივე ავიაკომპანია სანქცირებულია – მათ ევროკავშირის ქვეყნებში ფრენა ეკრძალებათ

ცნობისთვის, 7 თებერვალს სოხუმის აეროპორტმა პირველი სატესტო რეისი მიიღო მოსკოვიდან, რომელიც ავიაკომპანია „UVT Aero“-მ განახორციელა.

2023 წლის ოქტომბერში ცნობილი გახდა, რომ ოკუპირებული აფხაზეთის ე.წ. მთავრობამ ხელი მოაწერა ხელშეკრულებას სოხუმის აეროპორტის რეკონსტრუქციის შესახებ, შპს "ინფრასტრუქტურის დეველოპმენტთან", რომლის ერთადერთი მფლობელია რუსეთის შინაგან საქმეთა სამინისტროს ყოფილი ხელმძღვანელის, ამჟამად კი რუსეთის უშიშროების საბჭოს მდივნის პირველი მოადგილის, რაშიდ ნურგალიევის ერთ - ერთი ვაჟი, რაშიდ ნურგალიევი.

2019 წლის ივლისში ოკუპირებული აფხაზეთის ე.წ. მთავრობამ მიიღო დადგენილება სოხუმის აეროპორტისთვის "ერთობლივი აეროდრომის" სტატუსის მინიჭების და ასო-კოდის მინიჭების შესახებ. ამ დოკუმენტის შესაბამისად, აფხაზეთის საჰაერო სივრცეს მიენიჭა ოთხასოიანი კოდი "URAS" რუსეთის ფედერაციის საავიაციო ინფორმაციის კრებულში (AIP) შემდგომ შესატანად.

საქართველოს სამოქალაქო საავიაციო სააგენტო მაშინ განცხადებით გამოეხმაურა ოკუპირებული აფხაზეთის მთავრობის გადაწყვეტილებას სოხუმის აეროპორტის აღდგენის შესახებ. გავრცელებულ განცხადებაში აღნიშნულია, რომ საქართველოს ნებართვის გარეშე, სოხუმის აეროპორტში საერთაშორისო საჰაერო მიმოსვლა ვერ განხორციელდება.

2006 წელს სამოქალაქო ავიაციის საერთაშორისო ორგანიზაცია ICAO - მ გააუქმა სოხუმის აეროპორტის კოდი და დოკუმენტებიდან ამოიღო ინფორმაცია ამის შესახებ.

ICAO-ს არ აქვს სოხუმის აეროპორტისთვის მინიჭებული ადგილმდებარეობის განმსაზღვრელი ოთხნიშნა კოდი. აღნიშნული კოდის მინიჭება მხოლოდ უფლებამოსილი საავიაციო ხელისუფლების შუამდგომლობის საფუძველზე ხდება.