გალის რაიონის ე.წ. ადმინისტრაციის უფროსი კონსტანტინე ფილია აფხაზური ტელეგრამ - არხების მიერ გამოქვეყნებულ ვიდეოს ეხმაურება, რომელზეც, საქართველოს მოქალაქეების ჯგუფი აფხაზეთში მოგზაურობაზე საუბრობს.  ფილიას განმარტებით, ვიდეოს ავტორმა, ენგურის ხიდი მარტომ, ჯგუფის გარეშე გადაკვეთა.

"მოვისმინე, რაც მან თქვა ვიდეოში: მარტო შემოვიდა, ჯგუფთან ერთად არ მოსულა. მარტო ჩავიდა, ადგილობრივები დახვდნენ და წაიყვანეს რიწაში, მერე ერთად გადაიღეს სურათები. ყველა დანარჩენი ადგილობრივია. და ეს კაცი, რომელიც პირველ ვიდეოშია, მარტო ჩამოვიდა და მარტო წავიდა. წასვლისას კი თქვა, რომ აქ მეგობრები იპოვა, ცუდი მხოლოდ ის არის, რომ ვიზას დიდხანს უნდა ელოდო და ვიღაცამ უნდა იზრუნოს ვიზაზეო, ამაზე ლაპარაკობს. უკვე სამმა ადამიანმა თარგმნა სიტყვასიტყვით ჩემთვის და არც ერთი ცუდი სიტყვა არ უთქვამს. სიტყვასიტყვით ამბობს, რომ მისი მოგზაურობა დასრულდა, ჰყვება, რომ აქ იყო, იქ იყო, შეხვდა მეგობრებს, მეგრელებსა და აფხაზებს, ერთადერთი სირთულე ვიზის აღება იყო და მეტი არაფერი...", - უთხრა ფილიამ ინტერნეტ გამოცემა "აიაირას".

მან აღნიშნა, რომ ამ ერთი ადამიანის გარდა, დანარჩენები გალის მცხოვრებლები არიან.

"ყველა დანარჩენი, ადგილობრივია, ვიდეოსაც კი გამოგიგზავნით, სადაც ნახავთ, როგორ ბრუნდება მარტო, სად იწერს ენგურის ხიდზე ვიდეოს აფხაზეთში ჩასვლაზე", ის დასძენს, ქართველი მოგზაური "ვიზით შევიდა აფხაზეთში და არც ერთი ცუდი სიტყვა არ უთქვამს".

ვიდეოს ავთენტურობაში ეჭვი ეპარება დე ფაქტო რესპუბლიკის ყოფილ შინაგან საქმეთა მინისტრს და დეპუტატს ასლან კობახიას. ის თვლის, რომ ვიდეო უხეშად არის დამონტაჟებული.

"არც ერთმა ჩვენგანმა არ იცის, ვინ არიან ეს ადამიანები. შემიძლია ნებისმიერი ფოტო დავდო და ვთქვა, რომ ეს ქართველები არიან, მაგრამ ვინ იცის, რომ ისინი ქართველები იყვნენ? მე ვხედავ ამ ჯგუფურ ფოტოს, მაგრამ გარდა იმისა, რომ ქართულად წერია "ჩვენ დავბრუნდებით", მეტს ვერაფერს ვიტყვი. იმისთვის, რომ ამაზე პროფესიონალურად გავაკეთო კომენტარი, უნდა ვიცნობდე ამ ადამიანებს. შუბლზე არ აწერია, რომ ეს ქართველები არიან. ან იქნებ სომხები არიან ან აფხაზები?... ასეთი შემადგენლობით არც ერთი ქართული ჯგუფი არ შემოვა, თუ უსაფრთხოების გარანტიები არ ექნებათ. და უსაფრთხოების გარანტიებს ამ ქვეყანაში მხოლოდ სამთავრობო უწყებები უზრუნველყოფენ" , - აღნიშნა მან. 

გამოცემა წერს, რომ "გაურკვეველია, რატომ გავრცელდა მხოლოდ ახლა ვიდეო, რომელიც გასული წლის ნოემბერში გადაიღეს". 

აფხაზურმა ტელეგრამ - არხებმა ცოტა ხნის წინ გამოაქვეყნეს ვიდეო, რომელზეც, მათივე ინფორმაციით, ასახულია საქართველოს მოქალაქეთა ჯგუფის დე ფაქტო რესპუბლიკაში მოგზაურობა. ვიდეოდან ჩანს, რომ "ქართველი მოგზაურები" აფხაზეთში სავარაუდოდ, ადგილობრივების მიწვევით იმყოფებოდნენ, რომლებმაც უმასპინძლეს კიდეც.

სოხუმში საკითხს ჯერჯერობით არ გამოხმაურებიან.

ცნობისთვის, საქართველოს მოქალაქეებს, რომლებიც არ ცხოვრობენ გალის რაიონში, ოკუპირებულ აფხაზეთში სპეციალური ნებართვის გარეშე ჩასვლა არ შეუძლიათ. სამეგრელო - აფხაზეთის ადმინისტრაციული საზღვრის გადასაკვეთად, გალის რაიონის მცხოვრებლებს, დროებითი დოკუმენტი, ე.წ. "ფორმა №9"- უნდა ჰქონდეთ ან "ბინადრობის მოწმობა" რომლის მისაღებად, როგორც სოხუმში აცხადებენ, "ადამიანი, სულ მცირე, 10 წელი უნდა ცხოვრობდეს აფხაზეთის ტერიტორიაზე, ხოლო პირმა, რომელსაც აფხაზეთის მოქალაქეობაზე აქვს პრეტენზია, საქართველოს მოქალაქეობაზე უნდა განაცხადოს უარი".